ІІM gospıtalinde polıtsııa qyzmetkerlerine arnalǵan ońaltý ortalyǵy ashyldy
ASTANA. KAZINFORM – Іshki ister mınıstrliginiń Ortalyq gospıtalinde qyzmettik mindetin atqarý barysynda jaraqat alǵan jáne túrli aýrýlarǵa shaldyqqan ІІO qyzmetkerlerine arnalǵan ońaltý ortalyǵy jumysyn bastady.
Polıtsııa qyzmeti árdaıym qaýip-qatermen baılanysty. Táýelsizdik jyldary ishinde qyzmettik boryshyn óteý kezinde bes myńǵa jýyq qyzmetker túrli jaraqat alǵan. Bul jaı ǵana statıstıka emes — árbir sannyń artynda azamattardy qorǵap júrip, ózderi de qoldaý men ońaltýdy qajet etetin adamdardyń taǵdyry tur.
Іshki ister mınıstriniń tapsyrmasy boıynsha gospıtalda qyzmetkerlerdi keshendi ońaltýdan ótkizýge barlyq jaǵdaı jasalǵan. Munda olar qalpyna keltirý emin alyp, tolyqqandy ómirge jáne qyzmetke qaıta oralýǵa múmkindik alady.
Alǵashqy qabyldaý 20 sáýirde ótti — ortalyqqa elimizdiń ár óńirinen 12 qyzmetker jiberildi. Ońaltý negizgi medıtsınalyq baǵyttar boıynsha júrgiziledi: travmatologııa, nevrologııa, kardıologııa jáne terapııa.
Patsıentterge zamanaýı emdeý protsedýralarynyń keń aýqymy qoljetimdi: emdik dene shynyqtyrý, massaj, mehanoterapııa, gıdrokınezoterapııa, balneoterapııa, lazerlik terapııa jáne ózge de qalpyna keltirý ádisteri.
Ortalyqtyń jumysy turaqty negizde uıymdastyrylady — qabyldaýlardy toqsan saıyn ótkizý josparlanyp otyr.
Ortalyqtyń ashylýy — jeke quramdy qoldaý júıesindegi naqty qadam. Іshki ister mınıstrligi el qaýipsizdigi úshin kúndelikti jaýapkershilik júktelgen qyzmetkerlerdi qoldaý deńgeıin arttyryp otyr.
Aıta ketelik Almatyda ІІM-niń jańa akademııasynyń qurylysy bastalǵan edi.
