M. Galkın reseılik telearnalardyń birinde ákelik qýanyshymen bólisti
ASTANA. 8 qazan. QazAqparat - Alla Pýgachevanyń joldasy Maksım Galkın «Reseı 1» telearnasyna suhbat berip, balalary kúni keshe emes, osydan shamamen bir aı buryn dúnıege kelgenin moıyndady.
«Qýanyshymdy sózben aıtyp jetkize almaspyn. Men endi áke bolýdyń qandaı ekenin túsindim», - dep aǵynan jaryldy reseılik ártis.
18 qyrkúıekte dúnıege kelgen balalary týraly habardy nege qupııada ustadyńyzdar degen suraqqa Galkın: «Ne degenmen áli kýálikterin almaǵan, perzenthanadan shyqpaǵan sábılerdi jurtqa jarııa etkimiz kelmedi», - dedi.
Galkın tipti egizderdiń kimge uqsaǵanyn da jasyrmady. Onyń sózine qaraǵanda, uly ózine, al qyzy Pýgachevaǵa uqsaıdy eken. Al qos sábıdiń atyn Elızaveta men Garrı dep onyń jubaıy qoıǵan kórinedi.
Efırde, sonymen qatar, Pýgacheva men Galkınniń balalaryn qursaǵynda 9 aı boıy kótergen kelinshektiń esimi jarııa boldy. Ol - Qazan qalasynyń turǵyny Elena Shırınına. «Qudaı densaýlyqty berip tursa, nege týmasqa? Óz basyma balalardy berý qıynǵa soqqan joq. Óıtkeni men bireýge ana, bireýge áke baqytyn sezinýge múmkindik berdim», - dep túsindirdi kelinshek osynaý áreketin.
