M. Ǵabdýllınniń týǵanyna 100 jyl tolýyna oraı onyń 20 tomdyǵyn shyǵarýdy qazirden qolǵa alý kerek -J. Erǵalıev
ASTANA. 1 naýryz. QazAqparat -M. Ǵabdýllınniń týǵanyna 100 jyl tolýyna oraı onyń 20 tomdyǵyn shyǵarýdy qazirden qolǵa alý kerek.
Búgin QR Parlamenti Senatynyń jalpy otyrysynda depýtat Jabal Erǵalıev osy máseleni kóterip, Úkimet basshysynyń atyna saýal joldady.
Saýal barysynda depýtat kórnekti qoǵam qaıratkeri Málik Ǵabdýllınniń týǵanyna 2015 jyly 100 jyl tolatynyn aıtyp, osyǵan oraı qaıratkerdiń mereıtoıyna osy bastan kirisý qajettigin atap ótti. «Bul baǵytta arnaıy Úkimettik komıssııa qazir qurylsa eken. Ásirese, ǵalym eńbekteriniń 20 tomdyǵyn shyǵara bastaý isin búgin qolǵa alǵan abzal bolar edi. Ǵasyrda bir týar Málik Ǵabdýllın syndy tulǵanyń, halqymyzdyń uly perzentiniń 100 jyldyǵy elimiz boıynsha laıyqty atalyp ótýine búgin daıarlyq jasaǵan durys dep oılaımyz», - deıdi J. Erǵalıev.
