ІІM esirtki satatyn chattar men saıttardyń anonımdi oqyrmandaryn qalaı tekseredi

ASTANA. KAZINFORM – Іshki ister mınıstrligi Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov ortalyq kommýnıkatsııalar qyzmetinde ótken baspasóz máslıhatynda esirtki satatyn saıttardyń anonımdi qoldanýshylaryn áshkereleýge ne kedergi ekenin aıtty.

- Árıne, bul baǵytta uıaly baılanys operatorlarymen, onyń ishinde KCell kompanııasymen de nómirlerdi anonımsizdendirý baǵytynda ózara ýaǵdalastyq bar. Biraq, ókinishke qaraı jekelegen keıbir nómir ıeleri VPN qoldanady. Olardyń izin kesý múmkin emes. Biraq qalaı degenmen de ár qylmystyń tsıfrlyq izi qalady. Ár qylmysqa jiti den qoıamyz. Áleýmettik jelini, ınternet keńistikti baqylaý baǵytynda júıeli jumys jolǵa qoıylǵan. Bul jerde tek másele ýaqytqa ǵana tirelip tur. Nómir ıesin qashan anyqtaı alǵanymyzǵa baılanysty bári, - dedi ol jýrnalıst suraǵyna bergen jaýabynda.

ІІM ókili mundaı saıttarǵa kirgen adamnyń bárine nashaqor dep qaraýǵa bolmaıtynyn aıtady.

- Men bul jerde esirtki saýdasyna arnalǵan saıttarǵa kiretinder týraly da aıtyp otyrmyn. Olardyń arasynda zańǵa baǵynatyn, parasatty adamdar bar. Ondaı adamdar targettelgen jarnamanyń kesirinen aldanyp sol saıttarǵa tap bolyp jatady, - dedi Qýandyq Áljanov.

Eske salsaq, Mádenıet jáne aqparat mınıstri Aıda Balaeva anonımdi telegram arnalardyń jumysy ashyq shyǵarylatynyn aıtqan bolatyn.