ІІM eskertedi: ınternet-alaıaqtardyń negizgi qurbandary – jastar men zeınetkerler

ASTANA. KAZINFORM – Qazaqstanda ınternet-alaıaqtyqtyń negizgi qurbandary jastar men zeınetkerler bolyp otyr, dep habarlaıdy Polisia.kz.

ІІM Kıberqylmysqa qarsy is-qımyl departamenti 2024 jáne 2025 jyldyń alǵashqy segiz aıynyń derekterin salystyrdy. Bıyl alaıaqtardyń arbaýyna jıi túsetinder qatarynda jastardyń úlesi artqany anyqtaldy. «2024 jyly 18 ben 30 jas aralyǵynda shamamen eki myń jábirlenýshi tirkelse, bıyl olardyń sany úsh myńǵa jetti», – dedi departament basqarma bastyǵynyń orynbasary Áset Júkenov.

Onyń aıtýynsha, 60 jastan asqan adamdar da ınternet-alaıaqtardyń jıi qurbanyna aınalyp otyr. Bul jastar men qarııalardyń osal topqa jatatynyn aıqyn kórsetedi.

Sonymen qatar ınternet-alaıaqtyqqa «droptar» da qatysady. Olar túrli sebeppen ózderiniń bank kartalaryn alaıaqtarǵa beretin azamattar. «Osylaısha qylmyskerler shottaǵy qarajatty qolma-qol aqshaǵa aınaldyrady», – dep túsindirdi Á.Júkenov.

Vedomstvo ókili 15 qyrkúıekten bastap Qylmystyq kodekske engizilgen ózgerister kúshine enetinin eske saldy.

«Endi óz kartasyn alaıaqtarǵa bergen adamdar qylmystyq jaýapkershilikke tartylady. Bul úshin jeti jylǵa deıin bas bostandyǵynan aıyrý jazasy qarastyrylǵan», – dep atap ótti ol.

Aıta keteıik, alaıaqtyqtan zardap shekken azamattarǵa qarajatty qaıtarý isi jeńildeıdi.