ІІM elordadaǵy páterde qarý saqtaǵan sheteldiktiń isine túsinik berdi
ASTANA. KAZINFORM – Іshki ister mınıstriniń orynbasary Sanjar Ádilov Astanada sheteldiktiń qarý-jaraq saqtaý oqıǵasyna qatysty túsinik berdi.
— Bul páter boıynsha keshendi saraptama júrgizýdi tapsyrdyq. Keler aptanyń basynda onyń nátıjesin alyp, túpkilikti sheshim qabyldaımyz. Qazir tergeý jalǵasyp jatyr, - dedi S. Ádilov Senattyń jalpy otyrysynan keıin tilshiler suraǵyna jaýap bere otyryp.
Sonymen qatar ol atalǵan páter Nazarbaev ýnıversıtetine tıesili emes ekenin naqtylady.
— Ol Nazarbaev ýnıversıtetiniń oqytýshysy emes, ıaǵnı jalǵa alǵan páter bolǵan, dedi mınıstrdiń orynbasary.
Onyń aıtýynsha, qazir sheteldik azamat el aýmaǵynda tergeý organdarynyń barlyq saýalyna jaýap berip jatyr.
Buǵan deıin habarlaǵanymyzdaı, tekseris júrgizýge turǵyndardyń biriniń páterge kúmándi zat kirgizdi degen shaǵymy túrtki bolǵan.
Oqıǵa ornyna jedel jetken polıtsııa qyzmetkerleri tekserý jumystaryn júrgizdi.
Quzyrly organnyń málimetinshe, jáshiktiń ishinde tarıhı ári mádenı qundylyǵy bar antıkvarlyq qarý úlgileri bolǵan.
Sarapshylardyń qorytyndysyna sáıkes, bul zattar zamanaýı atys qarýyna jatpaıdy jáne turǵyndarǵa eshqandaı qaýip tóndirmeıdi.
Sáýir aıynyń aıaǵynda QR Ǵylym jáne joǵary bilim mınıstri Saıasat Nurbek Nazarbaev ýnıversıtetiniń páterinde qarý saqtaǵan sheteldiktiń ustalýy jónindegi aqparatqa qatysty málimdeme jasady.
