ІІM: Elimizde jyl basynan beri 17 esirtki zerthanasy joıyldy
ASTANA. KAZINFORM — Bıylǵy jyldyń alǵashqy jeti aıynda elimizde 4,5 myń esirtkige qatysty quqyq buzý tirkeldi
Іshki ister mınıstrligi «Zań men tártip» qaǵıdatyn iske asyrý aıasynda esirtki qylmysyna qarsy kúres jáne onyń aldyn alý baǵytyndaǵy jumystardy jalǵastyryp jatyr. Bıylǵy jyldyń alǵashqy jeti aıynda elimizde 4,5 myń esirtkige qatysty quqyq buzý tirkeldi. Zańsyz esirtki aınalymyna qarsy júrgizilgen jumystyń nátıjesinde 17 sıntetıkalyq esirtki óndiretin jasyryn tsehtyń qyzmeti toqtatyldy.
Sonymen qatar 7 uıymdasqan qylmystyq toptyń joly kesilip, olarǵa qatysty 12 qylmystyq is qozǵaldy. 9 uıymdastyrýshy men 41 qatysýshy ustaldy. Esirtki qylmysyna qarsy is-qımyl barysynda zańsyz aınalymnan 865 keli esirtki zaty tárkilendi. Bul — mıllıondaǵan doza esirtkiniń zańsyz aınalymǵa túsýine jol berilmegenin bildiredi. Jasóspirimderdi esirtki ortasyna tartý máselesine erekshe nazar aýdarylyp otyr. Jyl basynan beri 55 kámeletke tolmaǵan bala ustaldy. Olardyń 32-si esirtki ótkizýmen baılanysty áreketterge qatysy bar.
Esirtki qylmysynyń aldyn alý baǵytynda profılaktıkalyq jumys ta kúsheıtildi. Ýákiletti organdar 2 mıllıonnan astam jas pen jasóspirimdi qamtyǵan 14 myńnan astam is-shara ótkizdi. Aqparattyq keńistiktegi túsindirý jumystary da jalǵasyp jatyr. Buqaralyq aqparat quraldary men áleýmettik jelilerde esirtkige qarsy taqyrypta 24 myńǵa jýyq jarııalanym jaryq kórdi. Sonymen qatar esirtki bıznesiniń qarjylyq negizin joıýǵa baǵyttalǵan sharalar qabyldanýda. 258 mln teńge kólemindegi qarajatqa qatysty 10 myń bank kartasy men shot buǵattaldy.
Budan bólek, esirtki saýdasynyń kóleńkeli qarjy shemalaryna qatysy bar 215 myń sheteldik karta-shottyń tranzaktsııalaryna shekteý qoıyldy. Internet keńistiginde de zańsyz esirtki aınalymyna qarsy jumys júrgizilýde. Nátıjesinde 8,5 myńǵa jýyq esirtki taratatyn saıt buǵattaldy. Memlekettiń esirtkige qarsy saıasaty qoǵamnyń qaýipsizdigin qamtamasyz etýge, azamattardyń densaýlyǵyn qorǵaýǵa jáne esirtkiniń taralýyna jol bermeýge baǵyttalǵan. Bul baǵyttaǵy keshendi jumystar aldaǵy ýaqytta da jalǵasady.
Aıta ketelik Petropavlda iri mólsherde esirtki taratpaq boldy degen kúdikpen Astana turǵyny ustalǵan edi.
