M.Eleýsizov QR Prezıdenttigine úmitker retinde saılaýǵa qatysatyndyǵyn málimdedi

M.Eleýsizov ótken saılaýda da Prezıdenttik orynnyń aýyly alysta bolǵandyǵyn bile tura qatysqandyǵyn aıtady. «Prezıdenttik saılaýǵa túsý arqyly tabıǵat, ekologııa máselelerin keńinen kóterýge múmkinshilik bolatynyn burynnan aıtyp kelem. Ótken saılaýda birqatar máselelerdi kóterip, olardyń sheshilýine qol jetkize aldym. Tabıǵat ta úlken saıasat, sondyqtan odan tys qalǵym kelmeıdi. Qazir dúnıejúzinde úlken apattar oryn alyp jatyr, aýa raıy ózgerýde, sol sebepten qol qýsyryp otyra almaımyn», -deıdi M.Eleýsizov.

Sondaı-aq ol demokratııaly el bolǵandyqtan úmitker retinde qatysýǵa quqyly ekendigin aıtady. «Men prezıdenttike ótem be, ótpeımin be, ol meni mazalamaıdy. Men demokratııaly eldiń azamaty retinde ózimdi usynamyn. Bizdiń qoǵamnyń kemshin tusy bar. Ol -halyqtyń saılaýǵa nemquraıly qaraýy. Úmitkerler unaý, unamaýy mańyzdy emes, bastysy - demokratııaly eldiń azamaty retinde saılaýǵa qatysyp, óz únińdi bildirý», -deıdi úmitker.

Sonymen qatar ol óziniń jeke baǵdarlamasy bar ekendigin jáne onda mádenıet, demokratııa máseleleri de qamtylǵandyǵyn, biraq ekologııa basty nazarda ekendigin aıtyp ótti. «Baǵdarlamam burynǵydaı tabıǵat máselesine arnalǵan kúıinde qala beredi. Qazaqstannyń ekologııasy kún saıyn nasharlaýda, bul salada 20 jyldan astam ýaqyt jumys istegendikten bul jaǵdaı maǵan jat emes», -dep atap ótti óz sózinde M.Eleýsizov.

M.Eleýsizov saılaý aldynda eldi mekenderdi ýaqyttyń tyǵyzdyǵyna baılanysty aralamaıtyndyǵyn aıtady. «Byltyr aýyldy jerlerde bolyp halyqpen júzdeskenmin. Bıyl ondaı múmkindik bolmaıdy, tek bólingen qarajatty aqparat salasyna tıimdi bólemin», -deıdi ol.