ІІM eldi mekenderden tys kúre joldardyń eń qaýipti ýchaskelerin patrýldeý aýqymyn arttyrsyn — Premer tapsyrmasy
ASTANA. KAZINFORM — Negizgi avtomobıl joldaryndaǵy ortasha jyldamdyqty baqylaý jelisin keńeıtip, vızýaldy baǵdar beretin lazerlik júıelerdi ornatýdy keńeıtý qajet. Bul týraly Úkimet otyrysynda Premer-mınıstr Oljas Bektenov aıtty.
— Eldi mekenderden tys trassalar. Jan túrshigerlik apattardyń basym bóligi dál osy joldarda oryn alady. Avtomobıl joldarynyń kópshiligi eski standarttar boıynsha salynǵan. Olar eki jolaqty, eni shamamen 7 metrdi quraıdy. Kóptegen ýchaskelerde tıisti jol ınfraqurylymy joq. Júrgizýshiler sapasyz joldarǵa, jaryqtyń nasharlyǵyna jáne navıgatsııa máselelerine shaǵymdanady. Bul jol qaýipsizdigi deńgeıine aıtarlyqtaı áser etedi. Anyqtalǵan aqaýlardy joıý jumystarynyń qarqyny baıaý, ýaqtyly jóndelmeıdi, — dedi Úkimet basshysy.
Osy rette Premer-mınıstr Kólik mınıstrligine múddeli memlekettik organdarmen birlesip, eldi mekenderden tys avtojoldardyń qoldanystaǵy jol-kólik ınfraqurylymyn jetildirý boıynsha keshendi sharalar qabyldaýdy tapsyrdy.
— Joldardy salý men jóndeý kezinde standarttardyń qatań saqtalýyna baqylaýdy kúsheıtý kerek. Budan bólek, negizgi avtomobıl joldaryndaǵy ortasha jyldamdyqty baqylaý jelisin keńeıtip, vızýaldy baǵdar beretin lazerlik júıelerdi ornatýdy keńeıtý qajet. Іshki ister mınıstrligi eldi mekenderden tys kúre joldardyń eń qaýipti ýchaskelerin patrýldeý aýqymyn arttyrsyn. «QazAvtoJol» kompanııasy, «Qazgıdromet», ákimdikter, Іshki ister, Tótenshe jaǵdaılar jáne Kólik mınıstrlikteri elimizdiń avtomobıl joldarynda tehnıkalardyń, jabdyqtardyń jáne jylytý pýnktteriniń qysqy kezeńge daıyndyǵyn qamtamasyz etsin, — dedi Oljas Bektenov.
Úkimet basshysy Jasandy ıntellekt mınıstrligi eldi mekenderden tys avtojoldardy mobıldi baılanyspen qamtý jumystaryn jedeldetýi qajettigin basa aıtty.
— Sonymen qatar jol ústinde janýarlardy qaǵyp ketý — ózekti máselelerdiń biri. Jyl basynan beri osyndaı 200-den astam jaǵdaı tirkeldi. Ákimdikterge jol mańynda mal jaıý máselesi boıynsha mal ıelerimen jumysty kúsheıtýdi tapsyramyn. Kólik jáne Іshki ister mınıstrlikteri Pavlodar oblysynyń jol boıynda qorshaý torlaryn ornatý tájirıbesin qoldaný múmkindigin qarastyrýy qajet, — dedi ol.
Buǵan deıin jol erejesin óreskel buzatyndar júrgizýshi kýáliginen 1 jylǵa aıyrylýy múmkin ekenin jazǵan edik.
