M.Dýlatov mektep oqýshylaryna arnap esep kitabyn shyǵarǵan - professor A. Іsmaqova
ALMATY. 9 jeltoqsan. QazAqparat /Ádilet Musahaev/ - M.Dýlatov 20-ǵasyrdyń basynda qazaqty órkenıetti elderdiń qataryna qosylýǵa shaqyryp, ne bári 24 jasynda "Oıan, qazaq" dep aıtyp ketti.
Sol úshin kináli bolyp, patsha úkimetiniń qara tizimine ilindi. Bul jaıynda búgin fılologııa ǵylymdarynyń doktory, professor Aıgúl Іsmaqova Almatydaǵy "Elim dep soqqan uly júrek" atty ǵylymı-tájirıbelik konferentsııa barysynda aıtty.
Professor aýqatty, musylman otbasynan shyqqan M.Dýlatov qara basynyń qamyn emes, qazaq ultynyń bolashaǵyn oılap, jastardy bilimge shaqyrǵandyǵyn aıtady. "Sol tusta Ahmet, Mirjaqyp bastaǵan Alash zııalylary qazaq eliniń táýelsizdigi men qazaq ǵylymyn jasaý úshin óz bastaryn qaterge tikti. Olardyń bar kinálary qazaqty - qazaq bolsyn degeni", - deıdi A. Іsmaqova.
A. Іsmaqova óz sózinde M.Dýlatov atyn alyp otyrǵan mekteptiń túlekteri keleshekte elimizdiń maqtanyshyna aınalyp, qazaq úshin eńbek etetin, tipten Nobel syılyǵyn alatyn azamattar shyǵady ma degen úmitpen kelip otyrǵandyǵyn jetkizdi.
"M.Dýlatov qoǵam qaıratkeri ǵana emes, ǵalym da bolǵan. Alash zııalylary qazaq mektepterine qazaq tildi oqýlyqtar jazaıyq degendi alǵa qoıǵan. M.Dýlatov mektep oqýshylaryna arnap esep kitabyn shyǵardy. Ol esep formýlalaryn oqýshylardy jalyqtyryp almas úshin qazaqtyń kúndelikti turmystyq ómirindegi qoı, eshki sııaqty janýarlardy jáne qurt, maıdy mysalǵa ala otyryp jetkize bilgen. Sonymen qatar ol qazaq órkenıetti elderdiń qataryna qosylyp, qashan aldynda júredi degen oılaryn óleń retinde qaldyryp ketken", - deıdi professor.
A. Іsmaqova 20-ǵasyrdyń basynda orystar qazaqtardy qyrǵyz dep ataǵandyǵyn aıta kele, sol kezde M.Dýlatov onymen kelispeıtindigin bildirip, maqala da jarııalaǵandyǵyn jetkizdi.
