ІІM depýtattardyń alaıaqtyq qurbandaryna ótemaqy tóleý qoryn qurý usynysyn qoldady
ASTANA. KAZINFORM – Іshki ister mınıstrligi Májilis depýtattarynyń alaıaqtardyń qurbandaryna ótemaqy tóleý qoryn qurý usynysyna qoldaý bildirdi. Bul týraly Májilis depýtattarynyń saýalyna Іshki ister mınıstriniń birinshi Baýyrjan Álenovtiń jaýabynda aıtylǵan.
— Kıberqylmysqa qarsy is-qımyl máseleleri boıynsha aqparat almasý jáne jedel áreket etý bóliginde vedomstvoaralyq ózara is-qımyl aıasynda Іshki ister mınıstrligi ýákiletti organdarmen, onyń ishinde Ulttyq qaýipsizdik komıtetimen memorandýmdar men kelisimder jasasty. Aıta ketý qajet, UQK memleket qaýipsizdigin qamtamasyz etý jáne strategııalyq, onyń ishinde syrtqy sıpattaǵy kıberqaýipterdiń aldyn alý fýnktsııalaryna ıe. JSDP partııasynyń Memlekettik ótemaqy qoryn qurý, jalǵyz turǵyn úımen jasalatyn mámilelerdi mindetti notarıattyq kýálandyrý jáne jyljymaıtyn múlik mámilelerinde kútý kezeńin engizý jónindegi usynystary zerdelenip, qoldaý tabýda, — dedi mınıstrdiń birinshi orynbasary.
Onyń aıtýynsha, ІІM atalǵan salalarda memlekettiń quqyqtyq qamtamasyz etýi men zańnamalyq túzetýler engizý fýnktsııalaryna ıe emes.
— Osyǵan baılanysty bul máselelerdi ýákiletti organdardyń talqylaýyna shyǵarýdy usynamyz. Sonymen qatar ІІM qoldanystaǵy zańnamaǵa ózgerister men tolyqtyrýlar ázirleýge qatysýǵa daıyn. Internet-alaıaqtyqqa qarsy is-qımyl jasaý, qylmyskerlerdiń qarjylyq ınfraqurylymyn anyqtaý jáne buǵattaý, sondaı-aq osy saladaǵy zańnamany jáne quqyq qoldaný tájirıbesin jetildirý ІІM-niń sózsiz basym baǵyttary sanalady, — dedi Baýyrjan Álenov.
Esterińizge sala ketsek, 2025 jyly elimizde 28 myńǵa jýyq ınternet-alaıaqtyq qylmysy tirkeldi.
