M.Tsýkerberg: damýshy elderde ınternetti keńeıtý 140 mln. jumys ornyn asha alady

ASTANA. QazAqparat - Damýshy elderdegi ınternetke qoljetimdilik 140 mln. jumys oryndaryn ashýǵa jáne 160 mıllıon adamdy kedeıshilikten shyǵarýǵa kómektesedi. Bul týraly senbi kúni BUU shtab-páterindegi ornyqty damý jónindegi sammıt aıasynda iri Facebook áleýmettik jelisiniń negizin qalaýshy Mark Tsýkerberg aıtty.

Tsýkerberg búginde kúnine 4 mlrd. adam jahandyq jeli usynatyn múmkindikke qol jetkize almaı otyrǵanyn atap ótti.

«Internetti damýshy elderdegi kóptegen adamdarǵa qosa otyryp, biz 140 mln. jańa jumys ornyn asha alamyz jáne 160 mln. adamdy qaıyrshylyqtan qutqaramyz jáne 600 mln.-nan astam balaǵa eleýli shyǵynsyz bilim berýge múmkindik beremiz», - dedi ol.

Onyń aıtýynsha, «ınternet jaı ǵana kompıýterler jelisinen góri kóp dúnıe».

«Bizdiń zamanymyzda ol áleýmettik-ekonomıkalyq progrestiń mańyzdy qozǵaýshy kúshi», - dep sanaıdy Facebook negizin qalaýshy. Ol sondaı-aq búkililemdik ǵalamtordy «adamnyń quqyqtary men múmkindikterin yntalandyrýdyń mańyzdy quraly retinde qaraýǵa» shaqyrdy.

Tsýkerberg ınternetti keńeıtý jáne múmkindigin paıdalanýdy ornyqty damýdyń 17 maqsatyn oryndaý strategııasynyń negizine alýdy usyndy.

«Mıllıardtaǵan adamdar ınternetti óz pikirin bildirýge jáne ózgeristerge qol jetkizýge paıdalanady, - dedi mıllıarder, - eger biz shynynda álem ulttaryn biriktirgimiz kelse, onda olardy jelige qosýdan bastaıyq».