ІІM bolashaq polıtseılerdi irikteý talaptaryn ózgertti

— Іshki ister organdaryna qatardaǵy, kishi jáne orta basshylyq quram laýazymdaryna qyzmetke qabyldaý azamattar ІІM bilim berý uıymdarynda bastapqy kásibı daıarlyqtan ótkennen keıin júzege asyrylady, — delingen qujatta.

Qujatta kórsetilgendeı, jyl saıyn ІІM-niń kadr qyzmeti 1 jeltoqsanǵa deıin kelesi kúntizbelik jylǵa arnalǵan bastapqy kásibı daıarlyqtyń josparyn ázirleıdi. Ony Іshki ister mınıstri bekitedi. Jospar ІІM qurylymyndaǵy kadr qyzmetteri bergen ótinimder negizinde jasalady.

Sonymen qatar kandıdattardy irikteý aqparattyq júıe arqyly júrgiziledi. Úmitker JSN arqyly tirkelip, jeke kabınetin ashady.

Іrikteý kezeńderinen ótý barysynda kandıdat:

• tek ózi qatysýy jáne bógde adamdardyń bolmaýyn qamtamasyz etýi; 
• ornynan ketpeýi;
• ekrannan kózin burmaýy;
• beıneni jappaýy;
• beınekamerany óshirmeýi;
• telefonmen sóılespeýi;
• kompıýterge basqa adamdardyń qashyqtan kirýine múmkindik beretin baǵdarlamalardy, qulaqqaptardy, qosymsha elektrondy, baspa, qaǵaz jáne ózge de materıaldardy paıdalanbaýy tıis.

Belgilengen talaptar saqtalmaǵan jaǵdaıda irikteý rásimi toqtatylyp, onyń nátıjeleri jaramsyz dep tanylady.

Kandıdattardy irikteý protsesin kadr qyzmeti uıymdastyrady. Ol birneshe kezeńnen turady:

• irikteý týraly habarlandyrý jarııalaý; 
• qatysýǵa nıet bildirgen azamattardyń qujattaryn qabyldaý;
• qujattardyń durystyǵy men tolyqtyǵyn tekserý;
• qyzmetke jaramdylyǵyn anyqtaý úshin kandıdattardy ІІM áskerı-dárigerlik komıssııalaryna medıtsınalyq tekserýge jiberý;
• polıgrafologııalyq zertteýden ótý;
• test tapsyrý;
• tergeý nemese kıberqylmysqa qarsy is-qımyl bólimderindegi laýazymdarǵa úmitkerler úshin esse jazý;
• fızıkalyq daıyndyǵy boıynsha normatıvter tapsyrý;
• suhbattasý;
• irikteýden ótken kandıdattardy ІІM bilim berý uıymdaryna bastapqy kásibı daıarlyqqa jiberý.

Qujatta suhbattasý men fızıkalyq daıyndyǵy boıynsha normatıv tapsyrý barysy tehnıkalyq beınejazba quraldary arqyly tirkeletini kórsetilgen.

Qazaqstan Respýblıkasynyń azamattary irikteýge qatysý úshin qajetti qujattardy jeke kabıneti arqyly usynady. 

Olardyń qatarynda:

• irikteýge jiberý týraly ótinish; 
• elektrondy túrde toltyrylǵan ómirbaıan;
• bilim týraly qujat jáne qosymshasy;
• bilimi, eńbek tájirıbesi jáne kásibı deńgeıine qatysty qosymsha aqparattar (biliktilikti arttyrý, ǵylymı dáreje men ataq berý týraly qujattar, sporttyq jetistikteri, minezdemeler, usynymdar, ǵylymı jarııalanymdar jáne basqa da qujattar bolǵan jaǵdaıda);
• zańnamany bilý jáne quqyq qorǵaý qyzmetine túsetin azamattardyń jeke qasıetterin baǵalaý boıynsha test nátıjeleri kiredi.
Ótinishke qol qoıǵannan keıin kandıdattyń jeke kýáligi, eńbek qyzmeti jáne áskerı qyzmetke qatysy týraly málimetter aqparattyq júıege avtomatty túrde engiziledi.

Sonymen qatar kandıdat qujat tapsyrý kezinde aqparattyq júıege jaqyn týystary týraly málimetterdi (aty-jóni, JSN, týystyq dárejesi) engizip, jeke derekterin jınaýǵa jáne óńdeýge kelisimin beredi.

Kandıdatqa aqparattyq júıe arqyly medıtsınalyq jáne psıhofızıologııalyq tekserýden ótý qajettigi týraly habarlama jiberiledi.

Tekserý nátıjeleri oń bolǵan jaǵdaıda kadr qyzmetiniń mamandary kandıdattyń qaǵaz túrindegi jeke isin rásimdeıdi.

Polıgrafologııalyq zertteý nátıjesi boıynsha qorytyndyny aýmaqtyq bólimsheniń polıgraf mamany aqparattyq júıege engizip, kadr qyzmetine joldaıdy. Nátıjeler óńdelgennen keıin kandıdattyń jeke kabınetine testileýge jiberilgeni týraly habarlama keledi.

Kandıdat bes jumys kúni ishinde test tapsyrady. Ol aqparattyq júıe arqyly testileýge daıyn ekenin rastaıdy. Testileý bes mınýtqa sozylady jáne 10 suraqtan turady.
Testileýden keıin tergeý nemese kıberqylmysqa qarsy bólimderge úmitkerler esse jazý kezeńinen ótedi. Al basqa laýazymdarǵa úmitkerler fızıkalyq daıyndyǵy boıynsha normatıv tapsyrady.

Esse taqyryby tańdalǵan qyzmet baǵytyna sáıkes kezdeısoq túrde avtomatty túrde anyqtalady. Esse kólemi 250-400 sóz bolýy kerek. Ony oryndaýǵa 90 mınýt beriledi.
Esse jasandy ıntellekt tehnologııalary arqyly tekserilip, nátıjesinde kandıdatqa qorytyndy baǵa qoıylady.

Fızıkalyq daıyndyǵy boıynsha normatıv tapsyrý kezinde kandıdattar:

• «A», «B» jáne «S» dene daıyndyǵy sanattaryna; 
• medıtsınalyq-jas toptaryna bólinedi.
«A» jáne «B» sanatyndaǵy er kandıdattar úshin myna normatıvter qarastyrylǵan (tańdaý boıynsha):
• 100 metrge júgirý nemese 10 metr qashyqtyqty 10 ret qaıtalap júgirip ótý;
• kermege tartylý nemese brýsıada deneni kóterý;
• 1000 metrge júgirý nemese kúshtik jattyǵýlardy jasaý.

Áıel kandıdattar (tańdaý boıynsha):

• 100 metrge júgirý nemese 10 metr qashyqtyqty 10 ret qaıtalap júgirip ótý;
• shalqasynan jatyp deneni kóterý nemese jatyp qoldy búgý-jazý;
• 1000 metrge júgirý nemese jatyp tirelgen qalyptan sekirip turý jattyǵýyn jasaý.

Qabyldaý komıssııasynyń otyrysynda kandıdattyń testileý nátıjeleri, esse jazý qorytyndysy jáne dene daıyndyǵy boıynsha tapsyrǵan normatıvteri baǵalanady. Sondaı-aq onyń ishki ister organdaryna qyzmetke ornalasý sebepteri anyqtalady. 

Komıssııa kandıdatqa qyzmettegi shekteýler, jumystyń ereksheligi, qajet bolǵan jaǵdaıda jumys ýaqytynan tys, demalys jáne mereke kúnderi qyzmetke tartylýy múmkin ekeni, sondaı-aq qyzmettegi jeńildikter men artyqshylyqtar týraly túsindiredi.

Komıssııa kandıdattyń bastapqy kásibı daıarlyqqa jiberilýi nemese jiberilmeýi týraly sheshim qabyldaıdy.

Bastapqy kásibı daıarlyqtan ótý sharttary

Bastapqy kásibı daıarlyq kýrsanttary ózimen birge:

• jeke kýáligin; 
• maýsymǵa sáıkes kamýflıajdy kıim úlgisin;
• sporttyq kıim men aıaq kıimin;
• jeke gıgıena zattaryn;
• jazý quraldaryn alyp kelýi qajet.

Kýrsanttar bıýdjet qarajaty esebinen tamaqpen jáne jatyn orynmen qamtamasyz etiledi.

Barlyq baǵyt boıynsha bastapqy kásibı daıarlyqtyń oqý merzimi 9 apta bolady.
Budan bólek, bastapqy kásibı daıarlyqta oqyǵan ýaqyty ІІO-daǵy qyzmet ótiline qosylady.
Bastapqy kásibı daıarlyqtan ótken azamattar ІІM kadr quramyna qabyldanady. Al taǵylymdamadan ótýshilermen eńbek sharty zań talaptaryna saı toqtatylyp, paıdalanylmaǵan demalysy úshin ótemaqy tólenedi. Kandıdat qyzmetke kadr quramyna qabyldanǵannan keıin bir aı ishinde taǵaıyndalady.

Eske salaıyq, polıtsııa qyzmetkerleri drondardy basqarý boıynsha daıyndyqtan ótken edi.