ІІM: byltyr jol-kólik oqıǵalarynan bolatyn ólim-jitim 9,7%-ǵa tómendedi
ASTANA. KAZINFORM — Qazaqstan Respýblıkasynyń Іshki ister mınıstrligi alǵashqy ulttyq AI Governance Cup baıqaýynda «AI Qaýipsizdik» nomınatsııasy boıynsha jeńimpaz atandy. Úzdik joba retinde ІІM-niń «TOR» — jol qaýipsizdigin qamtamasyz etýge arnalǵan biryńǵaı respýblıkalyq tsıfrlyq platformasy tanyldy. Bul týraly ІІM baspasóz qyzmeti málim etti.
Jobanyń basty ereksheligi — jasandy ıntellektini qoldaný. JI beınebaqylaý jáne avtomatty tirkeý júıesine engizilgen. Ol kameralardan kelip túsetin derekter aǵynyn taldap, kólik quraldaryn tanıdy, olardy izdeýdegi derektermen salystyrady jáne joldardaǵy yqtımal qaýipti jaǵdaılardy anyqtaýǵa múmkindik beredi.
— Qarapaıym tilmen aıtqanda, júıe tek quqyq buzýshylyqtardy tirkep qana qoımaıdy. Ol polıtsııaǵa izdeýdegi kólikterdi jedel anyqtaýǵa, olardyń qozǵalys baǵytyn baqylaýǵa, avtokólikti markasy, modeli jáne túsi boıynsha sáıkestendirýge, sondaı-aq júrgizýshilerdiń qaýipti minez-qulyq belgilerin aıqyndaýǵa kómektesedi, — delingen habarlamada.
Bul jedel áreket etýge jáne eń bastysy — quqyq buzýshylyqtardyń aldyn alýǵa, adam ómirin saqtaýǵa múmkindik beredi.
Tek 2026 jyldyń basynan beri «TOR» júıesiniń kómegimen: ️
- basqarý quqyǵynan aıyrylǵanyna qaramastan kólik júrgizgen shamamen 1 myń júrgizýshi anyqtalyp, ustaldy; ️
- izdeýde bolǵan 1,7 myńnan astam avtokólik tabyldy; ️
- memlekettik tirkeý nómirinsiz júrgen 3 myńǵa jýyq avtokólikti paıdalaný toqtatyldy, sondaı-aq 230-dan astam jalǵan nómirli kólik anyqtaldy; ️
- saqtandyrýy men tehnıkalyq baıqaýy joq 15,5 myńnan astam avtokólik anyqtaldy.
2025 jyldyń qorytyndysy boıynsha jol-kólik oqıǵalarynan bolatyn ólim-jitim 9,7% tómendedi.
2026 jyldyń birinshi toqsanynyń qorytyndysy boıynsha — 3,7% tómendeý tirkeldi. Oń dınamıka, sonyń ishinde, tsıfrlyq sheshimderdi engizýdiń nátıjesinde saqtalyp otyr. Qazaqstan Respýblıkasynyń Іshki ister mınıstrligi azamattardyń qaýipsizdigin qamtamasyz etý maqsatynda zamanaýı tsıfrlyq sheshimderdi engizý jumysyn jalǵastyrady.
Buǵan deıin ІІM qylmys 9%-ǵa tómendegenin habarlaǵan edi.
