ІІM Basqarý akademııasynda ushqyshsyz ushý apparattary operatorlaryn daıarlaý qolǵa alyndy

ASTANA. KAZINFORM – Іshki ister mınıstri Erjan Sadenov ІІM Basqarý akademııasynda ashylǵan ushqyshsyz ushý apparattary operatorlaryn daıarlaýǵa arnalǵan mamandandyrylǵan zerthana men polıgonnyń jumysymen tanysty.

Jańa zerthananyń ereksheligi – FPV-drondarmen jumys isteýdiń tolyq tsıklin qamtýynda. Munda 3D-prınterler arqyly bólshekterdi jobalaý jáne daıyndaýdan bastap, drondardy qurastyrý, tehnıkalyq baptaý jáne synaqtan ótkizýge deıingi barlyq kezeńder júzege asyrylady. Bul tyńdaýshylarǵa pılottaý daǵdylaryn meńgerýmen qatar, FPV-drondardyń qurylymy, jumys isteý qaǵıdalary jáne paıdalaný erekshelikterin tereń túsinýge múmkindik beredi.

Qurylǵan polıgon ushqyshsyz ushý apparattaryn basqarý boıynsha praktıkalyq daıyndyqqa arnalǵan. Onda operatorlar manevr jasaý, basqarý daǵdylaryn jetildirý jáne shynaıy jedel jaǵdaılarǵa uqsas ortada oqý tapsyrmalaryn oryndaý múmkindigine ıe bolady. Sonymen qatar, ІІM Basqarý akademııasynda ushqyshsyz ushý apparaty operatorlaryn daıarlaýdyń mamandandyrylǵan kýrstary engizildi. Bul kýrstar Ashyq Aspan Foundation qorymen birlesip ázirlengen oqytýdyń ekinshi kezeńin qamtıdy. Ekinshi kezeń tereńdetilgen praktıkalyq daıyndyqqa, FPV-drondarmen jumys isteýge jáne kúrdeli jaǵdaılarda sheshim qabyldaý daǵdylaryn damytýǵa baǵyttalǵan.

Іs-shara barysynda ushqyshsyz ushý apparattaryn basqarý mamandaryn daıarlaý júıesin jetildirý jáne ishki ister organdary qyzmetinde ushqyshsyz tehnologııalardy qoldaný aıasyn keńeıtý máseleleri qaraldy.

Eske sala keteıik, budan buryn Qazaqstannyń Desanttyq-shabýyldaý áskerlerinde ushqyshsyz avıatsııalyq júıelerdi damytý baǵytynda turaqty ilgerileý bar ekenin jazǵan edik.