ІІM: Bangkoktan jetkizilgen 11 kg gashısh maıy tárkilendi
ASTANA. KAZINFORM - Arnaıy tekserý is-sharalary barysynda polıtsııa qyzmetkerleri Ulttyq qaýipsizdik komıtetiniń Shekara qyzmetimen birlesip, Qazaqstannyń ońtústik astanasyndaǵy halyqaralyq áýejaıda esirtki kontrabandasynyń jolyn kesti - dep habarlaıdy Polisia.kz.
- Bangkok - Almaty reısimen kelgen 20 jastaǵy shetel azamaty ustaldy. Jeke tekserý kezinde odan jalpy salmaǵy shamamen 11 kılogramm bolatyn gashısh maıy salynǵan 12 plastıkalyq ydys tárkilendi. Jyl basynan elimizde esirtki kontrabandasynyń 57 deregi anyqtalyp, joly kesildi. Atalǵan fakti boıynsha Qazaqstan Respýblıkasynyń Qylmystyq kodeksiniń 286-babymen qylmystyq is qozǵaldy. Baptyń sanktsııasy múlikti tárkileı otyryp, 20 jylǵa deıin nemese ómir boıyna bas bostandyǵynan aıyrý jazasyn kózdeıdi. Ustalǵan kúdikti ýaqytsha ustaý ızolıatoryna qamaldy. Esirtki trafıgi arnalarynyń jolyn kesý, transulttyq qylmystyq toptardyń qyzmetine tosqaýyl qoıý jáne memlekettik shekarany qorǵaý boıynsha jumystar jalǵasatyn bolady, - dedi ІІM esirtki qylmysyna qarsy is-qımyl komıteti tóraǵasynyń orynbasary Eldar Ábdikenov.
Sondaı-aq habarlamada Іshki ister mınıstrliginiń «Zań men Tártip» qaǵıdaty aıasynda elimizdiń tranzıttik-logıstıkalyq áleýetin transulttyq qylmystyq toptardyń esirtki trafıgi úshin paıdalanýyna jol bermeý baǵytynda jumystardy júrgizip jatqany aıtylǵan.
Osyǵan deıin Pavlodarda iri esirtki arnasynyń joıylǵany týraly jazdyq.
