ІІM balalar qaýipsizdigine qatysty ata-analarǵa úndeý jasady
ASTANA. KAZINFORM — Qazaqstan Respýblıkasy Іshki ister mınıstrligi balalar men jasóspirimderdiń qaýipsizdigine erekshe nazar aýdara otyryp, mańyzdy úndeý jasady. Bul týraly Polisia.kz jazdy.
— Keıde qarapaıym kóringen buzyqtyq nemese oılanbaı jasalǵan áreket birneshe sekýnd ishinde úlken qaıǵyǵa ákelýi múmkin. «Júgirip ótip úlgeremin», «Men tek qorqytqym keldi», «Ol maǵan tıisti, men de jaýap berýim kerek» degen sııaqty oılardyń sońy aýyr jaǵdaılarǵa ulasýy yqtımal. Mundaı sátterde adam kóbine áreketiniń saldaryn oılap úlgermeıdi. Alaıda kólik birden toqtaı almaıdy. Qarapaıym janjal tóbeleske aınalýy múmkin. Al qolyna kezdeısoq alynǵan zattyń ózi basqa adamǵa aýyr jaraqat keltirýi yqtımal, — delingen habarlamada.
Mundaı jaǵdaı bolǵannan keıin ýaqytty keri qaıtaryp, bolǵan oqıǵany ózgertý múmkin emes. ІІM balalarǵa myqtylyqtyń máni ózine qaýip tóndirýde, bireý ursa, jaýap retinde urýda nemese ózinikin kez kelgen jolmen dáleldeýde emes ekenin túsindiredi. Naǵyz myqtylyq — der kezinde toqtaı bilý, qajet bolsa, shegine bilý jáne arandatýǵa ermeý. Bireý ádeıi ashýǵa tıgen jaǵdaıda da sabyr saqtap, «Munyń sońy ne bolady?» dep oılanǵan mańyzdy. Polıtsııa ata-analardy balalarymen osyndaı jaǵdaılar týraly jıi sóılesýge shaqyrady.
— Olarǵa tek «bolmaıdy» dep tyıym salýmen shektelmeı, belgili bir árekettiń nege qaýipti ekenin jáne onyń qandaı saldarǵa ákelýi múmkin ekenin túsindirý qajet. Balalardy ashýǵa berilmeı, aldymen oılanyp, sodan keıin áreket etýge úıretý mańyzdy. Qandaı da bir qıyndyq týyndaǵan jaǵdaıda kómek suraýdan qoryqpaý, máseleni jasyrmaı, der kezinde úlkenderge nemese tıisti qyzmetterge júginý qajet. Keıde birneshe sekýnd ishinde qabyldanǵan bir durys sheshim adamnyń densaýlyǵyn, bolashaǵyn, tipti ómirin saqtap qalýy múmkin, — dep eskertti ІІM—nen.
Eske sala keteıik, buǵan deıin júk poıyzynyń mashınısi dalada jalǵyz júrgen tórt jasar balany qutqaryp qalǵanyn jazǵan edik.
