M.Ázilhanov: «E-Islam» portalynyń basqa dinı saıttardan ereksheligi - dinı radıkalızm qaýipteri, zaıyrlylyq pen dindarlyq atty aıdarlardyń uıymdastyrylýynda
ASTANA. 28 qarasha. QazAqparat - «E-Islam» portalynyń basqa dinı saıttardan erekshelegi - dinı radıkalızm qaýipteri, zaıyrlylyq pen dindarlyq atty aıdarlardyń uıymdastyrylýynda. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde atalǵan portaldy tanystyrýǵa arnalǵan brıfıngte QR Din isteri agenttiginiń tóraǵasy Marat Ázilhanov aıtty.
Onyń atap ótýinshe, portalda 7 negizgi jáne 12 qosymsha taqyryptyq aıdarlar bar. Atap aıtqanda, Qazaqstandaǵy ıslam, Islam jáne zaıyrly memleket, Islam jáne qoǵam, Islam - izgilik dini, dinaralyq únqatysý degen aıdarlar oryn alǵan. Portalda ornalastyrylǵan kúndelikti jańaryp otyratyn jańalyqtar tizbesi - saıttyń mańyzdy quramdas bóligi. Osy arqyly oqyrman Qazaqstandaǵy jáne álemdegi dinı ahýaldan der kezinde habardar bola alady. «E-ıslam portalynyń basqa dinı saıttardan erekshelegi dinı radıkalızm qaýipteri, zaıyrlylyq pen dindarlyq atty aıdarlardyń uıymdastyrylýynda. Saıttyń alǵashqy kezeńinde kúndelikti qoldanýshylar sany 3 myńǵa jýyq bolsa, kún saıyn olardyń sany myńnan kem túspeıdi», - dedi M.Ázilhanov. Sonymen qatar agenttik basshysynyń aıtýynsha, sarapshylar baǵany aıdarynda mamandarǵa tikeleı suraq joldap, jan-jaqty tushymdy jaýap alýǵa da múmkindik bar.
