ІІM azamattardy dropperlerdiń qatysýymen jasalatyn esirtki qylmystary týraly eskertti

ASTANA. KAZINFORM – Іshki ister mınıstrligi azamattardy dropperlerdiń qatysýymen jasalatyn esirtki qylmystaryna tartylý qaýpi týraly eskertedi, dep habarlaıdy Polisia.kz.

ІІM málimetinshe, sońǵy ýaqytta keıbir azamattar ońaı aqsha tabý maqsatynda zańsyz jeliler arqyly esirtki aınalymyna tartylýda. Qylmyskerler bank kartalaryn, krıptovalıýta ámııandaryn jáne basqa tólem quraldaryn paıdalanýdy usynyp, esirtki bıznesiniń qarjylyq izin jasyrady.

«Esińizde bolsyn: bank kartalaryn, mobıldi qosymshalardy jáne krıptoámııandardy úshinshi tulǵalarǵa berý – jaı qatelik emes, bul aýyr qylmysqa qatysyńyz bar degendi bildiredi. Eger sizdiń kartańyz nemese ámııanyńyz esirtkimen baılanysty qarjylyq operatsııalarda paıdalanylsa, ol dálel retinde qaralady jáne qylmystyq jaýapkershilikke tartylady. Mundaı áreketter bas bostandyǵynan aıyrý jazasyna ákelýi múmkin», – dedi ІІM Esirtki qylmysyna qarsy is-qımyl komıteti tóraǵasynyń mindetin atqarýshy Danııar Meıirhan.

Vedomstvo azamattardy alaıaqtardyń arbaýyna túspeýge, zańsyz áreketterge qatysýdan bas tartýǵa shaqyrady. Eger osyndaı jaǵdaılar týraly aqparat bolsa, dereý polıtsııaǵa habarlasý qajet.

Aıta keteıik, elimizde 6 myńnan astam dropper týraly málimetter anyqtaldy.