ІІM: Avtonesıeleýdiń qylmystyq shemasy áshkere boldy
ASTANA. KAZINFORM – Qazaqstanda avtonesıeleý salasyndaǵy qylmystyq shema áshkerelendi. Bul týraly Іshki ister mınıstrligi habarlady.
Vedomstvonyń málimetinshe, 19 qańtar kúni uıymdasqan qylmysqa qarsy kúres basqarmasynyń qyzmetkerleri Almaty jáne Shymkent qalalarynda, sondaı-aq Almaty, Batys Qazaqstan jáne Túrkistan oblystarynda jedel is-sharalar júrgizdi. Nátıjesinde áleýmettik osal azamattardyń atyna avtonesıe rásimdep, keıin avtokólikterdi shetelge satyp otyrǵan qylmystyq toptyń áreketi toqtatyldy.
Tergeý barysynda kúdiktilerdiń qorǵansyz azamattarǵa qysym kórsetip, qorqytý arqyly olardyń atyna avtonesıe rásimdetkeni anyqtaldy. Sonymen qatar tólem qabilettiligi bar degen jalǵan kórinis qalyptastyrý maqsatynda azamattardyń bank shottaryn ýaqytsha tolyqtyryp, kredıttik tarıhyn jasandy túrde jaqsartqan.
ІІM málimetinshe, kúdiktiler jalǵan qujattardy paıdalana otyryp, avtokólikterdi kepilge qoıyp, mıkroqarjy uıymdarynan nesıe alǵan. Keıin qymbat avtokólikter shetel aýmaǵynda satylǵan.
Qazirgi ýaqytta osyndaı 15 derek anyqtalyp, ózge de epızodtar boıynsha tergeý amaldary jalǵasyp jatyr. Tintý barysynda birneshe atys jáne sýyq qarý, oq-dáriler, sondaı-aq qylmystyq áreketterdi rastaıtyn qujattar men aqparat tasymaldaǵyshtar tárkilendi.
Atalǵan fakti boıynsha sotqa deıingi tergep-tekserý Qylmystyq kodekstiń birneshe baby boıynsha júrgizilýde. Qylmystyq toptyń negizgi alty kúdiktisi qamaýǵa alynyp, ýaqytsha ustaý ızolıatoryna qamaldy.
Aıta keteıik, buǵan deıin Jańaózende zańsyz kóshi-qon uıymdastyrǵan qylmystyq top ustaldy.