ІІM «Avtomektep» aqparattyq júıesin ázirledi

ASTANA. KAZINFORM — Kólik júrgizýshilerin daıarlaý qaǵıdalaryna sáıkes, avtomektepterdiń qyzmetin esepke alý jáne oqý toptaryn tirkeý protsesin avtomattandyrý maqsatynda QR ІІM «Avtomektep» aqparattyq júıesin ázirledi. 

Atalǵan júıe arqyly avtomektepterdegi oqý úderisi tsıfrlandyrylyp, oqý toptaryn tirkeý men esep júrgizý elektrondy formatta júzege asyrylady. Sonymen qatar avtomektepti aıaqtaǵany týraly kýálik tolyqtaı elektrondy formatqa aýystyryldy. Bul sheshim oqytýdan ótpeı qysqa merzimde kýálik berý faktilerin, sondaı-aq qujattardy qoldan jasaý múmkindigin boldyrmaýǵa baǵyttalǵan.

«Avtomektep» aqparattyq júıesi — ІІM-niń esebinde turǵan memlekettik aqparattyq júıe. Júıeniń ıntegratsııalyq servısi Smart Bridge platformasynda jarııalanǵan jáne jalpyǵa qoljetimdi. Qazirgi ýaqytta atalǵan platforma arqyly «CarLife» kásibı birlestigine tıesili «Avtomektep.kz» memlekettik emes aqparattyq júıesi qosylǵan. Qosylý jumystary elektrondyq úkimettiń aqparattandyrý obektilerin ıntegratsııalaý qaǵıdalaryna sáıkes júzege asyrylǵan.

Sonymen qatar ınternette jáne áleýmettik jelilerde júrgizýshilerdi jedeldetilgen onlaın kýrs arqyly daıarlaý jóninde usynystar taralyp jatyr. Osyǵan baılanysty ІІM azamattarǵa tek resmı avtomektepterde tolyq oqý kýrsynan ótýdiń mańyzyn eskertedi. Ásirese, avtokólikti basqarý daǵdylaryn qalyptastyrý úshin mindetti túrde praktıkalyq sabaqtardan ótý qajet, al mundaı daǵdyny tolyqtaı onlaın formatta meńgerý múmkin emes.

Aıta ketelik avtomektepter ІІM ruqsatymen ǵana ashylatynyn jazǵan edik.