ІІM avtobýstardyń jyldamdyǵyna qatysty talaptardy túsindirdi

ASTANA. KAZINFORM – Respýblıka boıynsha avtobýstardyń qatysýymen bolatyn jol-kólik oqıǵalarynyń sany artýyna baılanysty, QR ІІM avtobýstardyń jyldamdyǵyna qatysty jańa erejeler engizbekshi. Bul týraly Polisia.kz. jazdy.

— Jol júrisi qaýipsizdigin arttyrý jáne eldegi jol jaǵdaıyn jaqsartý maqsatynda jolda júrý qaǵıdalaryna eldi mekenderdegi avtobýstardyń jyldamdyǵyn tómendetýge qatysty túzetýler engizildi. Bul túzetýler aǵymdaǵy jyldyń 6 mamyrynan bastap kúshine endi. Taldaý kórsetkendeı, respýblıka boıynsha avtobýstardyń qatysýymen bolǵan jol-kólik oqıǵalarynyń sany 56%-ǵa ósken. Tek bıyldyń ózinde avtobýstardyń qatysýymen bolǵan jol apattarynda 25 adam qaza taýyp, 445 adam túrli jaraqat aldy. Avtobýstar kóleminiń úlkendigi men jolaýshylardyń kóp shoǵyrlanýyna baılanysty basqa kóliktermen salystyrǵanda qaýiptirek. Olardyń joǵary jyldamdyqpen júrýi aýyr zardapty jol apattaryna ákep soǵady, sondyqtan olarǵa qatysty eldi mekenderde jyldamdyǵy 50 km/saǵat bolýy kerek degen shekteý sharalary qabyldandy, — dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova.

Atalǵan buıryq 2023 jylǵy 30 qarasha men 14 jeltoqsan aralyǵynda «Ashyq NQA» portalynda jarııalandy. Ashyq talqylaý kezinde buıryq jobasy boıynsha 100-ge jýyq usynys kelip tústi, olar mınıstrlik tarapynan eskerildi.