ІІM aýlada otshashý uıymdastyrýǵa baılanysty qaýipsizdik talaptaryn eskertti
ASTANA. KAZINFORM - ІІM azamattardy pırotehnıkalyq buıymdardy qoldaný kezinde qaýipsizdik talaptaryn qatań saqtaýǵa jáne aınaladaǵy turǵyndardyń tynyshtyǵyn buzbaýǵa shaqyrady. Jyl basynan beri pırotehnıkany qoldaný jáne onyń aınalymyna qatysty talaptardy buzǵany úshin 251 adam ákimshilik jaýapkershilikke tartylǵan, - dep habarlaıdy Polisia.kz.
Sońǵy ýaqytta kópqabatty úılerdiń turǵyndary týǵan kún jáne ózge de merekelerdi tikeleı aýlada otshashý uıymdastyrý arqyly atap ótetin jaǵdaılar jıilep otyr. Onyń ishinde túngi ýaqytta da pırotehnıkalyq buıymdar qoldanylatyn jaǵdaılar bar. Alaıda birneshe mınýtqa sozylatyn merekelik otshashý kórshilerdiń narazylyǵyn týdyryp qana qoımaı, jaraqat alýǵa, órt shyǵýyna jáne ákimshilik jaýapkershilikke ákelýi múmkin.
- Eske salamyz: eldi mekenderde pırotehnıkalyq buıymdardy qoldanýǵa belgilengen talaptardy saqtaǵan jaǵdaıda ǵana ruqsat etiledi. Zańnamada merekelik kúnderge, sonyń ishinde Jańa jyl túnine qatysty eshqandaı erekshelik qarastyrylmaǵan. Jyl basynan beri pırotehnıkany qoldaný jáne onyń aınalymyna qatysty talaptardy buzǵany úshin 251 adam ákimshilik jaýapkershilikke tartyldy. Onyń ishinde 237 adam pırotehnıkalyq buıymdardy eldi mekenderde qoldanǵany úshin, taǵy 14 adam olardy saqtaý, paıdalaný, tasymaldaý jáne satý tártibin buzǵany úshin jaýapqa tartylǵan,-delingen habarlamada.
Sondaı-aq onda mundaı quqyq buzýshylyqtardyń eń kóbi iri qalalarda tirkeletini aıtylǵan. Astanada 74 adam, Almatyda 58 adam ákimshilik jaýapkershilikke tartyldy.
Qaýipsizdik máselesine erekshe nazar aýdarý qajet. Sertıfıkattalmaǵan pırotehnıkany paıdalaný jáne qarapaıym qaýipsizdik talaptaryn saqtamaý aýyr jaraqattarǵa jáne órtke ákelýi múmkin. Mundaı jaǵdaılardyń aldyn alý maqsatynda polıtsııa qyzmetkerleri órtke qarsy qyzmet mamandarymen birlesip profılaktıkalyq is-sharalar júrgizý ústinde.
Pırotehnıkalyq buıymdardy jetkizýshiler, qoımalar, bazarlar men saýda oryndary tekserilip, zańsyz saýda jasaýǵa jáne sertıfıkattalmaǵan pırotehnıkany ótkizýge jol bermeý sharalary qabyldanyp jatyr.
Taǵy bir mańyzdy másele – tynyshtyqty saqtaý. Jyl basynan beri elimiz boıynsha 79 myńnan astam tynyshtyqty buzý faktisi anyqtaldy. Onyń ishinde 78 myńnan astam adam ákimshilik jaýapkershilikke tartyldy.
-Azamattardy merekelik is-sharalardy uıymdastyrý kezinde jaýapkershilik tanytýǵa shaqyramyz. Qaýipsizdik talaptaryn saqtap, tek sertıfıkattalǵan pırotehnıkalyq buıymdardy satyp alyńyzdar jáne aınaladaǵy adamdardyń tynyshtyǵyn eskerińizder. Mereke jaraqatqa, órtke nemese ózge adamdarǵa qolaısyzdyq týǵyzatyn jaǵdaıǵa aınalmaýy tıis,-dep habarlady QR Іshki ister mınıstrliginiń baspasóz qyzmeti.
Osyǵan deıin ІІM kúmándi jobalarǵa aqsha salmaýǵa shaqyrǵan bolatyn.
