M.Áýezovtiń 115 jyldyǵyna oraı Almatyda kitap kórmesi ashyldy
ASTANA. 18 qyrkúıek. QazAqparat - 28 qyrkúıekte qazaq ádebıetiniń klassıgi, qazaq halqynyń sóz óneriniń, kórkem prozasynyń asqar shyńy, jazýshy-dramatýrg, ádebıet zertteýshisi Muhtar Omarhanuly Áýezovtyń týǵanyna 115 jyl tolady.
Osyndaı ataýly kúnge oraı jýyrda Respýblıkalyq kitap murajaıynda «Dáýirdiń uly, ǵasyrdyń úni» atty ǵulama ǵalymnyń shyǵarmashylyǵyna arnalǵan kitap kórmesi ashyldy. Bul týraly QR Mádenıet jáne aqparat mınıstrliginiń baspasóz qyzmetinen habarlandy.
Kórmeni mýzeı dırektory, akademık, belgili jazýshy Naǵashybek Qapalbekuly kirispe sózben ashty. Fılologııa ǵylymdarynyń doktory, Abaı atyndaǵy Qazaq ulttyq pedagogıkalyq ýnıversıtetiniń professory, kafedra meńgerýshisi Temirhan Tebegenov, M.Áýezov atyndaǵy ádebıet jáne óner ınstıtýtynyń bólim meńgerýshisi, fılologııa ǵylymdarynyń doktory, jazýshy, ádebıettanýshy Nurdáýlet Aqysh, «Áýezov úıi» ǵylymı-mádenı ortalyǵynyń aǵa ǵylymı qyzmetkeri Sanagúl Maılybaı jınalǵan jurtshylyqpen óz estelikterimen bólisti.
Kórmede oryn alǵan 1942 jyly Almaty qalasynda jaryq kórgen «Abaı» romanynyń tuńǵysh basylymy, mýzeı qoryndaǵy «Eńlik-Kebek» dramasy, «Qıly zaman», «Qarash-qarash», «Tas túlek» taǵy da basqa erterekte latyn áripterimen basylǵan sırek kezdesetin qundy kitaptar, uly qalamgerdiń eń basty týyndysy - «Abaı joly» roman-epopeıasynyń aǵylshyn, hındı, ýrdý, eston, uıǵyr jáne taǵy basqa shet el tilderinde shyqqan basylymdary kórneki oryn aldy. Shákirtteri T.Qojekeevtiń, T.Kákishevtiń, Z.Qabdolovtyń ustazǵa degen qurmetten, súıispenshilikten týyndaǵan «Eki kózimiz Muqańda», «Ustaz» t.b. estelik kitaptary da osy kórmede. Qoıylǵan kitaptardyń ishinde atap aıtatyn bir shyǵarma - ol jazýshynyń ózi oqyp, óz qolymen belgilep qoıǵan betteri bar Djon Dreperdiń «Evropanyń aqyl-oıynyń damýynyń tarıhy» atty 1896 jyly Kıevta jaryq kórgen, qazir mýzeı qorynda saqtaýly turǵan basylym.
