M.Áýezov teatrynda «Qıly zaman» tarıhı tragedııasynyń premerasy ótedi
ASTANA. 28 aqpan. QazAqparat - M.Áýezov atyndaǵy Qazaq memlekettik akademııalyq drama teatry 2, 6 naýryz kúnderi saǵat 18.30-da ótetin Muhtar Áýezovtiń romany boıynsha sahnalanǵan «Qıly zaman» tarıhı tragedııasynyń premerasyna shaqyrady, dep habarlady QR Mádenıet jáne aqparat mınıstrliginiń baspasóz qyzmeti.
Uly sýretker M.Áýezovtiń saıası nebir naýqandarǵa baılanysty eń aldymen Máskeýde orys tilinde jaryq kórgen soń baryp tól oqyrmanymen qaýyshqan «Qıly zaman» týyndysy alǵash ret 1997 jyly qoıylǵan bolatyn.
1916 jylǵy ult-azattyq kóterilisiniń, atap aıtqanda, Qarqara kóterilisiniń tarıhı baıanyn negizge ala otyryp halyqqa jasalǵan qııanattyń túp sebebine úńiltetin; patshanyń qazaq azamattaryn qara jumysqa alý týraly jarlyǵyna, otarshyldyq saıasat, zorlyq-zombylyqqa qarsy shyqqan eldiń keshegisi men búginin zerdeleýge bastaıtyn jańa qoıylymnyń eń basty ıdeıasy - rýhyńdy joǵaltpa, áleýmet! Rýhyń joǵalsa - eldigińniń joǵalǵany. Tarıh sabaqtary umytylmaýy, tarıh sabaqtastyǵy úzilmeýi kerek.
Sahnalyq nusqa - N.Orazalın, Qazaqstan Respýblıkasy Memlekettik syılyǵynyń laýreaty, qoıýshy-rejısser - Á.Rahımov, Qazaqstan Respýblıkasynyń eńbek sińirgen qaıratkeri, qoıýshy-sýretshi - E.Tuıaqov, Qazaqstan Respýblıkasynyń eńbek sińirgen óner qaıratkeri, kompozıtor - B.Dáldenbaı, Qazaqstan Respýblıkasynyń eńbek sińirgen qaıratkeri.
