M.Áýezov atyndaǵy teatr Bishkektegi gastrolin «Abaı» romantıkalyq tragedııasymen ashty
ASTANA. QazAqparat - Muhtar Áýezov atyndaǵy qazaq akademııalyq teatry Qyrǵyzstan astanasyna gastroldik saparmen bardy. Bishkek qalasynyń turǵyndary men qonaqtary bir apta boıyna qazaq akterler tobynyń tarıh, tragedııa, mahabbat jáne komedııa taqyryptaryndaǵy qoıylymdaryn tamashalaıdy.
Áýezov atyndaǵy teatr Bishkektegi gastrolderin qazaq ádebıetiniń uly qaıratkeriniń boıyndaǵy adamgershilik, ádildik syndy qasıetteri týraly baıandaıtyn «Abaı» romantıkalyq tragedııasymen ashty.
Teatr kórermenderge álemdik klassıktermen qatar qazaq dramatýrgteriniń shyǵarmalaryn da kórsetpekshi. Olardyń qatarynda «Syǵan serenadasy» mıýzıkli de bar.
Qyrǵyz astanasyna teatr trýppasymen birge qazaqstandyq qana emes, qyrǵyz teatr áýesqoılarynyń kózaıymyna aınalǵan KSRO Halyq ártisi, Qazaqstan Respýblıkasy kórnekti óner qaıratkeri, M.Áýezov atyndaǵy qazaq akademııalyq teatrynyń shyǵarmashylyq jetekshisi Asanáli Áshimov te bardy. Ol Gerhard Gaýptmannyń «Kún batar aldynda» atty qoıylymynda basty rólde oınaıtyn bolady, dep habarlaıdy strategy2050.
