M.Áýezov atyndaǵy Ońtústik Qazaqstan Memlekettik ýnıversıteti 75 jyldyǵyn atap ótti
Merekelik jıyn bilim ordasynyń aldynan boı kótergen uly jazýshy, ǵulama ǵalym Muhtar Omarhanuly Áýezovtyń eńseli eskertkishiniń ashylý rásimimen bastaldy, dep habarlaıdy QazAqparat tilshisi.
Saltanatty sharaǵa Bilim jáne ǵylym mınıstri Erlan Saǵadıev pen Túrkistan oblysynyń ákimi Janseıit Túımebaev, oqý oryndarynyń basshylary men stýdentter jáne túrli salada eseli eńbekterimen el abyroıyn asqaqtatyp júrgen ýnıversıtet túlekteri qatysty. Aımaq basshysy óziniń quttyqtaý sózinde irgesi qalanǵaly el damýyna súbeli úles qosyp kele jatqan oqý ornynyń ustazdaryna alǵys bildirdi.
«75 jyldyq tarıhy bar bilim ordasy úshin bıylǵy jyl tolaǵaı tabystarǵa toly boldy. Atap aıtsaq, elimizdegi joǵary oqý oryndarynyń reıtıngisinde ІІІ-oryndy ıelense, QS reıtıngisi boıynsha álemdegi 4,5 myń joǵary oqý oryndarynyń ishinde 609-dan 501-shi orynǵa kóterildi. Bul osynda uzaq jyldar boıy eńbek etip kele jatqan oqytýshy-professorlardyń eren eńbegi dep aıtar edim. Jalpy Túrkistan óńirinde 500 myńnan asa jas bar. Munda oqıtyn stýdentterdiń basym kópshiligin oblysymyzdyń jastary quraıdy. Endeshe osynda bilim alyp, óz salasynyń úzdigi atanǵan bitirýshi túlekter túrki dúnıesiniń ortalyǵyna aınalǵan Túrkistan oblysynda ózderiniń jańa múmkindikterin júzege asyrady dep senim bildiremin», - dedi Janseıit Túımebaev.
Shara barysynda belsendi qoǵamdyq qyzmeti jáne bilim berý men tárbıe isi protsesterin uıymdastyrýda eńbek etken ýnıversıtettiń birqatar qyzmetkerleri «Ybyraı Altynsarın», «Ǵylymdy damytýǵa sińirgen eńbegi úshin», «Bilim berý isiniń qurmetti qyzmetkeri», «Eńbek ardageri» tósbelgilerimen, sondaı-aq oblys jáne qala ákimderiniń alǵys hattarymen marapattaldy. Sonymen qatar, elimizdiń ıgi isteri men jańashyl bastamalarynyń aldyńǵy sapynan tabylyp júrgen oqý orynnyń túlekteri -QR Ulttyq Ǵylymdar Akademııasynyń prezıdenti, tehnıka ǵylymdarynyń doktory, professor, akademık M.Jurynovqa, ekonomıka ǵylymdarynyń kandıdaty, 1973 jyldan QazHTI komsomol komıtetiniń hatshysy, qoǵam qaıratkeri, 1993-1997 jyldary OQO ákimi qyzmetin atqarǵan Zaýytbek Turysbekovke jáne birqatar memleket jáne qoǵam qaıratkerlerine erekshe qurmet kórsetildi.
Aıta keteıik, Shymkent qalasyndaǵy atalǵan bilim ordasy 1943 jyly qurylys materıaldary tehnologııalyq ınstıtýty bolyp qurylǵan. Qazirgi tańda, munda 1700 oqytýshy-professor, 136 ǵylym doktory, 646 ǵylym kandıdaty men dotsent 20 myńnan astam shákirtke dáris berip keledi. 75 jylda ýversıtetten 100 myńǵa jýyq stýdent túlep ushqan.