M.Áýezov atyndaǵy akademııalyq drama teatrynda jańa qoıylym qoıylýda
ALMATY. Jeltoqsannyń 10-y. QazAqparat /Ádilet Musahaev/ - Jeltoqsan aıynyń 10 men 19-y aralyǵynda M.Áýezov atyndaǵy memlekettik akademııalyq drama teatrynda T. Nurmaǵambetovtyń «Qojanasyr tiri eken» atty komedııasynyń qoıylymy ótedi,
dep habarlaıdy QazAqparat.
Eki bólimnen turatyn mýzykalyq ertegi-komedııanyń qoıýshy-rejısseri - QR eńbek sińirgen qaıratker O.Kenebaev, qoıýshy-sýretshi - M.Saparov, kompozıtory - QR eńbek sińirgen qaıratker A.Raıymqulova.
Atalmysh spektakldiń arqaýy búgingi kún. Jalpy shyǵys, onyń ishinde túrki halyqtaryna ortaq folklorlyq keıipker Qojanasyrdyń, qazaq folklory keıipkerleri - Aldar kóse men Tazsha bala kózimen kórinetin búgingi kún jáne onyń adamgershilik bet-beınesi.
Aramyzda júrgen Qojanasyrdy satyp paıda tappaq bolǵan saýdagerler beınelenedi. Sonymen qatar ortaq babalary - Qojanasyrdy óz eline alyp ketý úshin kelgen túrki halyqtary ókilderiniń ózara daý-damaıy, pikir talasy kórsetiledi. Qojanasyr, Aldar Kóse men Tazsha bala túsken oqıǵalar pesa men spketakl alǵa tartatyn túpki ıdeıany ashýǵa tyrysady.
Qoıylym oqıǵalary kúlki týdyra otyryp halqymyzdyń, jalpy túrki áleminiń búgingi ahýalyn zerdeleı bilýge, bolashaǵy týraly oılanýǵa shaqyrady.
