ІІM aýa raıyna baılanysty kólik tizgindegen júrgizýshilerge úndeý jasady
ASTANA. KAZINFORM – Іshki ister mınıstrligi jol júrisine qatysýshylarǵa úndeý jasady. Bul týraly vedomstvonyń baspasóz qyzmeti málim etti.
— Qurmetti jol júrisine qatysýshylar! Kúzdiń bastalýymen usaq jol-kólik oqıǵalarynyń bolý qaýpi artady. Aýa-raıynyń ózgerýi jol júrisine qatysýshylar úshin qolaısyzdyq týdyrady. Jańbyr kórinýdi azaıtyp, dóńgelekterdiń syrǵanaýyna ákelýi múmkin. Jınalǵan sýdyń kesirinen asfalttaǵy kedir-budyrlar men shuńqyrlar kórinbeı, jol qaýipsizdigine keri áserin tıgizedi. Osyǵan baılanysty júrgizýshilerdi muqııat bolýǵa shaqyramyz. Qarańǵy ýaqytta jaryq qurylǵylarynyń durystyǵyn qadaǵalap, jaryqtandyrylǵan joldardy tańdańyz. Kenetten kedergiler paıda bolǵan kezde toqtaýǵa múmkindik beretin jyldamdyqty tańdańyz. Kúzde temperatýranyń ózgerýine baılanysty jolda, ásirese kópirler men ótkelderde muz paıda bolýy múmkin. Jolǵa basa nazar aýdaryńyz, kólik júrgizý kezinde telefon paıdalanbańyz jáne kólik basqarýdan alańdatatyn áreketterden aýlaq bolyńyz. Jol júrisi qaǵıdalaryn, jyldamdyq rejımin jáne qashyqtyqty saqtańyz, jyldam júris pen basyp ozýdan aýlaq bolyńyz, jaıaý júrginshilerdi nazardan tys qaldyrmaı, aınalańyzdaǵy jol jaǵdaıyn baqylaýda ustańyz. Avtokólik ıelerine aýa-raıynyń ózgerýin muqııat qadaǵalap, nasharlaǵan jaǵdaıda eldi mekenderden tys jerlerge shyǵýdy shekteý usynylady. Jaıaý júrginshiler aýa-raıynyń qolaısyzdyǵymen avtokóliktiń tez toqtaı almaıtynyn este ustaýy kerek. Kósheden ótpes buryn sizge jol bergenine kóz jetkizińiz, sodan keıin ǵana júristi jalǵastyryńyz. Іshki ister organdarynyń jeke quramyna qıyn jaǵdaıǵa tap bolǵandardyń barlyǵyna kómek kórsetý tapsyryldy. Barshańyzǵa qaýipsiz jol tileımiz! — dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova.
Eske sala keteıik, 12 qazanda saǵat 01:30–da Aqmola oblysynda aýa raıynyń buzylýyna baılanysty «Astana-Ereımentaý-Shıderti» avtojolynyń 16-200 shaqyrym aralyǵynda Astana qalasynan Pavlodar oblysynyń shekarasyna deıingi ýchaskede avtokóliktiń barlyq túriniń qozǵalysyna shekteý qoıylǵan bolatyn.
Al, tańǵy saǵat 8:00-den bastap aýa raıynyń jaqsarýyna baılanysty kelesi respýblıkalyq mańyzy bar avtojoldarda kóliktiń barlyq túrine qozǵalys qaıta ashylǵan edi.