ІІM Astana-Şýchınsk jáne Astana-Temirtaý baǵyttarynda jyldamdyq rejımin saqtaýǵa shaqyrdy
ASTANA. KAZINFORM – Astana – Şýchınsk jáne Astana – Temirtaý baǵyttaryndaǵy tasjoldarda ornatylǵan elektrondyq aqparattyq tablolarda kórsetiletin jyldamdyq shekteýleri jol qozǵalysy erejelerine sáıkes zańdy kúshke ıe. Osyǵan baılanysty Іshki ister mınıstrligi júrgizýshilerdi ýaqytsha shekteýlerdi qatań saqtaýǵa shaqyrdy, dep habarlaıdy Polisia.kz.
Mınıstrliktiń málimetinshe, atalǵan baǵyttardaǵy jyldamdyq rejımin buzǵany úshin salynǵan ákimshilik aıyppuldarǵa qatysty azamattardan kóptegen ótinish kelip túsken. Osyǵan oraı ІІM qala syrtyndaǵy joldarda ornatylǵan aqparattyq tablolar zańnama talaptaryna saı tolyqqandy elektrondyq jol belgileri bolyp sanalatynyn taǵy da eske saldy.
Vedomstvo dereginshe, elektrondyq tablolarda 3.24 «Eń joǵary jyldamdyqty shekteý» jol belgisi kórsetiledi. Bul tablolar tuman, kóktaıǵaq, qatty jańbyr sııaqty qolaısyz aýa raıy jaǵdaılarynda, sondaı-aq jol jóndeý jumystary nemese jol-kólik oqıǵasy oryn alǵan kezde naqty ýaqyt rejıminde ózekti jyldamdyq shekteýlerin kórsetedi.
ІІM júrgizýshilerdi tabloda kórsetilgen talaptardy mindetti túrde saqtaýǵa shaqyrady, sebebi olar trassadaǵy negizgi aqparat kózi bolyp esepteledi.
QR ІІM Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova ýaqytsha jyldamdyq shekteýleri barlyq jol qozǵalysyna qatysýshylardyń qaýipsizdigin qamtamasyz etý úshin engiziletinin atap ótti.
– Zań buzýshylyqtar táýlik boıy jáne kez kelgen aýa raıynda jumys isteıtin avtomatty kameralarmen tirkeledi. Ýaqytsha jyldamdyq shekteýlerin engizýdiń basty maqsaty – azamattardyń ómiri men densaýlyǵyn saqtaý. Sondyqtan barlyq júrgizýshini jolda jaýapkershilikpen júrýge, aýa raıy jaǵdaıyn eskerýge, jol belgilerin muqııat qadaǵalap, jol jaǵdaıyndaǵy ózgeristerge der kezinde áreket etýge shaqyramyz, – dedi ol.
ІІM málimetinshe, júrgizýshilerdiń jol júrý qaǵıdalaryn saqtaýy jol-kólik oqıǵalarynyń aldyn alýǵa jáne qaýipsiz qozǵalysty qamtamasyz etýge múmkindik beredi.
Aıta keteıik, ortasha jyldamdyqty esepteý tásili kólik apattarynyń sanyn 10 paıyz azaıtqan.