ІІM artyq salmaǵy bar polıtseılerge qatysty: Arnaıy baǵdarlama qarastyrylmaǵan
ASTANA. KAZINFORM — Artyq salmaq polıtseıdiń qyzmetine tikeleı áser etpegenimen, tártip saqshylarynyń kásibı daıarlyǵy tek zań bilýmen shektelmeıdi. Fızıkalyq daıyndyq pen salaýatty ómir salty da mańyzdy talaptardyń biri.
Polıtseı formasy tek bedel emes — jaýapkershilik pen tártip nyshany. Sondyqtan ishki ister organdarynda qyzmet etetin ár qyzmetkerdiń fızıkalyq daıyndyǵy men densaýlyǵy turaqty baqylaýda. Olar jyl saıyn kásibı qyzmettik jáne fızıkalyq daıyndyq deńgeıi boıynsha tekserýden ótedi. Árbir qyzmetkerdiń fızıkalyq daıyndyǵy baıqalady. Qarý qoldaný sheberligi jáne jaýyngerlik kúres ádisteri sııaqty baqylaý normatıvi bar. Kompıýterlik testileý arqyly qoldanystaǵy zańnamany bilý deńgeıi de anyqtalady. Іshki ister mınıstrliginiń málimetinshe, mundaı tekseris barlyq bóliniste turaqty negizde júrgiziledi.
— Polıtsııa qyzmetkerleriniń fızıkalyq daıyndyǵyn baǵalaý ishki ister organdarynyń qyzmetine qoıylatyn talaptarǵa sáıkes qyzmettik mindetterin tıisti deńgeıde oryndaýǵa múmkindik beredi ári kásibı daıarlyqtyń joǵary deńgeıin qamtamasyz etedi.
Polıtsııa qyzmetkerlerinde artyq salmaq ártúrli faktordyń, sonyń ishinde genetıkalyq beıimdilik, deneniń jeke qasıetteri jáne metabolıkalyq protsesterdiń áserinen qalyptasýy múmkin. Іshki ister mınıstrliginde jeke salmaqtan aryltý baǵdarlamalary qarastyrylmaǵan. Degenmen, deneni shynyqtyrý jáne artyq salmaqtyń aldyn alýǵa baǵyttalǵan is-sharalar júıeli túrde júzege asyrylady, — degen jaýap aldyq vedomstvodan.
Sonymen, ishki ister organdarynyń qyzmetkerleri artyq salmaqtyń qalaı aldyn alyp jatyr.
Mynadaı tásilder atqarylady:
— turaqty sabaqtar;
— dene shynyqtyrý daıyndyǵy boıynsha normatıvterdi tapsyrý;
— josparly medıtsınalyq tekserýden ótý;
— sporttyq-buqaralyq is-sharalarǵa qatysý;
— vedomstvoishilik sporttyq chellendjder men aktsııalarǵa qatysý;
bólinisterdiń sport zaldarynda jattyǵý;
— salaýatty ómir salty ustaný boıynsha profılaktıkalyq sharalar.
Osy oraıda, Іshki ister mınıstrligi polıtseıdiń qyzmetin toqtatý negizderi «Quqyq qorǵaý qyzmeti týraly» Qazaqstan Respýblıkasynyń 2011 jylǵy 6 qańtardaǵy zańyna sáıkes belgilenetinin málimdeıdi.
— Artyq salmaq — qyzmetkerdi jumystan shyǵarýǵa negiz emes, sheshim tek áskerı-dárigerlik komıssııanyń qorytyndysy negizinde qabyldanady. Sonymen qatar polıtsııa qyzmetkerleriniń qyzmettik mindetterin oryndaýyna eshqandaı syrtqy faktorlar yqpal ete almaıdy, sebebi qyzmettik mindetterge fızıkalyq turǵyda daıyn bolý — ishki ister organdaryndaǵy qyzmettiń ajyramas talaby, — dep jazylǵan vedomstvo jaýabynda.
Aıta ketsek, mamandar artyq salmaq pen semizdiktiń taralýy turǵylyqty jerge de baılanysty ekenin aıtady. Qalalyq jerlerde bul kórsetkish aýylǵa qaraǵanda edáýir joǵary bolady.