M.Altynbaev: Táýelsizdik tańy atqanda Qarýly kúshterimizdi qurýǵa úles qosqanymdy maqtan etemin
Jıynǵa qatysqan Májilistiń vıtse-spıkeri, general Abaı Tasbolatov, depýtat Baqytjan Ertaev, Halyq Qaharmany, táýelsiz Qazaqstannyń tuńǵysh ǵaryshkeri Aıdyn Aıymbetovter Muqtar Altynbaevtyń áskerı qatty minezimen qatar, Qazaqstan Qarýly kúshteriniń qalyptasýyna sińirgen zor eńbegin, qyzmettegi aǵalyq qamqorlyǵyn erekshe atap ótti. Al, mereıtoıy ıesiniń ózi bolsa, mundaı quttyqtaý sharalaryn ótkizýge qarsy bolǵanyn jasyrmady.
«Táýelsizdik tańy endi atqanda, Qarýly kúshimizdi saptaý kerek boldy. Rasyn aıtsam, qorǵanysymyzdy qaıdan, qalaı bastaý kerektigin eshkim bilmedi. Qıyn kezderden óttik. Sol kezde Elbasy únemi: «shydaı turyńdar, ekonomıkany sál durystap, halyq jaǵdaıyn kóterip alaıyq, sodan, qarjy bólip, bıýdjetterińizdi bekitemiz, Qarýly kúshimizdiń qýatyn arttyramyz»,-deıtin. Mine, sol kúnge de jettik. Qarýly Kúshterdi qurýǵa qatysqanymdymaqtanysh etemin», - deıdi armııa generaly.
M.Altynbaev bul rette Memleket basshysy Nursultan Nazarbaevqa zor densaýlyq, uzaq ǵumyr tiledi. Sonymen qatar, Qarýly kúshterdiń ardagerlerine de alǵysyn jetkizip, konferentsııaǵa jınalǵan jasulandyqtarǵa aqylyn aıtty.
«Senderdiń bolashaqtaryń áli alda. Biz elimizdi, jerimizdi senderge amanat etip qaldyramyz. Qazaqstannyń endigi órkendeýi men beıbitshiligi senderge amanat. Qazir sender bar kúsh-jigerlerińdi, ýaqyttaryńdy oqýǵa arnańdar. Sebebi, erteń, áskerı qyzmet bastalǵanda, qıyn bolady. Búgin oqyp úlgermegenderińdi qyzmet bastalǵanda qaıta oqý qıyn bolady. Sender úshin salynǵan áskerı mekteptiń bar múmkindigin paıdalanyp oqyńdar, men senderge senemin», - dedi general.
«Jalpy, men osy mereıtoıdy ótkizýge qarsy bolǵan edim. Parlament Senatynda, Qorǵanys mınıstrliginde de osyndaı sharalar ótpekshi. Ókinishke oraı, teńiz áskeri men ushqyshtarǵa bara almadym, biraq jaıaý áskerlermen kezdesip qaıttym. Men tipti 70 jasymdy ózim de elestete almaımyn. Biraq, bári maǵan «sizdiń jetpis jasyńyzǵa arnalǵan shara» dep, jetpiske kelgenimdi eske sala beredi», - dep qaljyńdady M.Altynbaev. «Jas ulǵaıa kele, - deıdi general - týǵan kún men mereıtoıdy toılaıtyn kez ketedi eken. Kezinde Premer-mınıstrdiń orynbasary bolǵan, kóptegen elderde elshi, Qazaqstanda mınıstr bolǵan Birǵanym Saryqyzynyń (Birǵanym Áıtimova - agenttik) aıtýynsha, Dúnıejúzilik densaýlyq saqtaý uıymy qazir adamzat 20 jylǵa jasaryp ketkenin málimdepti. Sondyqtan, men áli elý jastamyn» , - dedi taǵy da qaljyńǵa basqan M.Altynbaev.