ІІM: Almatydaǵy reıd kezinde qalada túngi jarystar uıymdastyrylatyny rastalǵan joq
ASTANA. KAZINFORM – Іshki ister mınıstrligi Kazinform saýalyna joldaǵan jaýapta Almatydaǵy reıdter kezinde anyqtalǵan quqyq buzýshylar arasynda jergilikti polıtsııa qyzmetkerleriniń bar-joǵyn naqty aıtpady.
– Ákimshilik quqyq buzýshylyq týraly kodekstiń 32-babyna sáıkes barlyq quqyq qorǵaý jáne arnaıy qyzmet qyzmetkerleri Jol júrisi qaǵıdasyn buzǵany úshin ákimshilik jaýapkershilikke jalpy negizder boıynsha tartylady, - dep jazady mınıstrlik mamandary.
Jaýapta jol erejesin buzǵan avtokólikter qymbat, arzan dep bólinbeıtini aıtylady. Sondaı-aq «avtojarystar» týraly aqparat rastalmaǵan.
– Almaty qalasynda jáne oblysyndaǵy reıdter qorytyndysynda zańsyz kólik jarysyn uıymdastyrý qalypty jaǵdaıǵa aınalyp ketkeni týraly málimetter anyqtalǵan joq, - delingen mınıstrlik málimetinde.
Eske salsaq, naýryz aıynda Almatydaǵy jol apatynan úsh adam qaza taýyp, qaladaǵy qoǵamdyq tártipti kúsheıtý úshin Astana men birneshe óńirden arnaıy reıd barǵan. Qaıǵyly oqıǵa áleýmettik jelide qyzý talqylanyp, «kólik apaty túngi jarys kezinde boldy» degen nusqa kóp aıtyldy.
