ІІM: áleýmettik jelidegi tanysý týraly jazbalardyń artynda alaıaqtar turýy múmkin
ASTANA. KAZINFORM – Áleýmettik jelilerde, ásirese Threads-te «jar izdeımin», «tanysqym keledi» degen jarııalanymdardy jıi kezdestirýge bolady. Mundaı jazbalardyń artynda qarapaıym jeli qoldanýshylarynan bólek alaıaqtar da bolýy múmkin, dep habarlaıdy Polisia.kz.
Alaıaqtar kóbine ózderin tartymdy jigit nemese qyz retinde tanystyryp, hat almasýdy belsendi túrde júrgizip, adamǵa erekshe kóńil bólip, qysqa ýaqyt ishinde senimge kiredi. Ýaqyt óte kele áńgime qarjylaı kómek suraýǵa ulasýy múmkin.
Alaıaqtyq shema ádette bylaı órbıdi:
- belsendi qarym-qatynas ornatý jáne emotsııalyq táýeldilik qalyptastyrý;
- ómirdegi qıyn jaǵdaılar, aýrý, shuǵyl shyǵyndar nemese tıimdi ınvestıtsııalar týraly áńgimeler;
- aqsha aýdarýdy, onyń ishinde qarajatty sheteldik krıptoámııandarǵa aýdarýdy nemese úshinshi tulǵalar arqyly jiberýdi suraý;
- qarajat alynǵannan keıin baılanys úzilip, jábirlenýshini buǵattaý.
- Eger ekrannyń arǵy jaǵyndaǵy adam sizden aqsha aýdarýdy surasa, beınebaılanystan jáne jeke kezdesýden qashsa, ınternettegi fotosýretterdi paıdalansa, saq bolǵan jón. Alaıaqtardyń arbaýyna túsip qalmas úshin:
-
ınternet arqyly tanysqan adamdarǵa aqsha jáne jeke derekterdi bermeý;
-
jeke fotosýretterdi jibermeý;
-
kúmándi siltemelerge ótpeý;
-
suhbattasýshynyń profılin jáne ol týraly aqparatty tekserý;
-
kúmán týyndaǵan jaǵdaıda jazbany toqtatý kerek, - delingen aqparatta.
Іshki ister mınıstrliginiń kıberqylmysqa qarsy is-qımyl departamenti azamattardy onlaın-tanysý kezinde saq bolýǵa jáne quqyqqa qaıshy áreketter týraly ýaqtyly polıtsııaǵa habarlaýǵa shaqyrady.
Aıta keteıik, buǵan deıin polıtsııa arzan baǵa da alaıaqtardyń tuzaǵy ekenin eskertken bolatyn.
