M.Ahtaeva: Ult josparyn oryndaý ár qazaqstandyqtyń mindeti bolýy tıis

ASTANA. QazAqparat - «Birligi bekem eldiń erteńi nurly, bilikti basshysy bar memlekettiń bolashaǵy baıandy». 6 qańtarda jaryq kórip, qalyń kópshiliktiń qoldaýyn tapqan Elbasynyń «Ult jospary - qazaqstandyq armanǵa bastaıtyn jol» atty maqalasy súıinshi habar ispetti. «5 ınstıtýttyq reformany júzege asyrý boıynsha 100 naqty qadamdy» kezeń-kezeńimen jasap, Ult josparyn oryndaıtyn, sózden iske kóshetin sát keldi. Bul pikirdi «QazAqparat» tilshisine Qazaq memlekettik qyzdar pedagogıkalyq ýnıversıteti janyndaǵy «Ulaǵat» bastaýysh partııa uıymynyń tóraıymy Marjan Ahtaeva bildirdi.

«Strategııalyq qujattaǵy baǵyt-baǵdar eldiń bolashaǵynyń nurly ekenin kórsetip berdi. Elbasy eńbeginde 5 ınstıtýttyq reformany iske asyrý joldary tegis qamtylǵan. Bastysy, memlekettik apparatty qaıta jasaqtaý, el ekonomıkasyn ósirýdiń tyń tásilderin qarastyrý, qarjylyq daǵdarysty eńserýdegi tıimdi josparlary jazylǵan.

Damýdyń sara jolyndaǵy atqarylar jumystardy salmaqtap bergen Memleket basshysy Táýelsizdiktiń 25-shi jyldyǵyna jańa qazaqstandyq armanmen aıaq basqanymyzdy, onyń basty maqsaty júzege asyrylyp jatqan «2050» Strategııasymen sáıkes ekenin jetkizdi», - dedi ol.

Onyń atap ótýinshe, Elbasy, «Nur Otan» partııasynyń Tóraǵasy N.Nazarbaev bes ınstıtýttyq reforma men «100 naqty qadam» Ult jospary aıasyndaǵy sharalardy halyqqa túsindirýde «Nur Otan» partııasyna aýqymdy mindetter júkteýde. Osy oraıda, «Nur Otan» partııasynyń aýdandyq fılıaldary men bastaýysh partııa uıymdaryna degen talaptyń kúsheıe túsetindigi anyq. Aýqymy keń, maǵynasy tereń maqalada da jemqorlyqpen kúres máselesi oryndy qozǵalǵan. Memlekettik qyzmetshiler de, bıýdjettik sala mamandary da ult múddesin arqalaǵan azamattar retinde áýeli adaldyǵymen, zańǵa beriktigimen barshaǵa úlgi bolýy tıis. Órkenıetti eldiń azamattary jemqorlyqtyń saldarymen kúresýden buryn kez kelgen sybaılastyq áreketterdiń aldyn alýǵa baryn salýǵa boryshty. Bul rette partııanyń baqylaý komıssııasy memlekettik baǵdarlamalardyń oryndalýyn qadaǵalap, qazyna qarjysynyń qajetimen jumsalýyn qyraǵy nazarda ustap keledi.

«Memlekettik qyzmetshige eńbekaqy tóleýdiń jańa júıesi de básekelestiktiń artyp, bilikti mamandardyń kóbeıýine yqpal etedi. Ásirese, Prezıdenttiń pármenimen týra 1 qańtardan «B» korpýsyndaǵy memlekettik qyzmetshilerdiń eńbekaqysy 30 paıyzǵa, medıtsına jáne bilim salasy mamandarynyń jalaqylary, sáıkesinshe, 28 ben 29 paıyzǵa, al áleýmettik qorǵaýdaǵy qyzmetkerlerdiń aılyǵy 40 paıyzǵa deıin kóterilgeni kópshilikti jigerlendirip, jumysqa jańasha kúshpen kirisýge yntalandyrdy. Jahandyq naqty ahýalda týyndaǵan kedergilerge qaramastan, memlekettik qoldaýdyń eseleı túsýi qazaqstandyq armanǵa jeteleıtin ıgi murattardy ómirsheń ete túspek», - dedi M.Ahtaeva.
«Ulaǵat» bastaýysh partııa uıymy tóraıymynyń paıymynsha, Prezıdent bizge jaqsy baǵyt-baǵdar berip otyr. Osyny oryndaý ár qazaqstandyqtyń mindeti bolýy tıis.

«Jumyla kótergen júk jeńil» demekshi, sonda ǵana elimiz odan ári qaryshtap damıdy jáne osy oraıda, barsha nurotandyqtar men bolashaq pedagogtardyń týǵan jerimizdiń gúldenip damýyna, elimizdiń qaryshtap qadam basýyna aıanbaı eńbek etýge daıyn ekenin jetkizgimiz keledi. Sózimdi Elbasynyń mańyzdy qujattaǵy qorytyndy oıymen aıaqtaǵym keledi «Men qazaqstandyqtardy ult josparyn júzege asyrýǵa jáne reformalardy júrgizýge barynsha belsendi qatysýǵa, olar ashatyn múmkindikterdi paıdalanýǵa shaqyramyn!», - dep túıindedi sózin ol.