M.Ahmadınejad: Tegranǵa qarsy jańa sanktsııalar engizý Iran men AQSh-tyń qarym-qatynasyn jaqsarta qoımaıdy
ASTANA. Mamyrdyń 5-i. QazAqparat - Tegranǵa qarsy jańa sanktsııalar engizý Iran men AQSh-tyń qarym-qatynasyn jaqsartýdyń múmkindigin joqqa shyǵarady, dep málim etti Iran Prezıdenti Mahmýd Ahmadınejad Nıý-Iorkte ótken baspasóz máslıhatynda. Bul týraly Associated Press agenttigi habarlap otyr.
«Eger sanktsııalar engiziletin bolsa, Iran men AQSh-tyń arasyndaǵy qarym-qatynas budan bylaı eshqashan jaqsarmaıdy», - dep málim etti Iran basshysy óz sózinde.
M.Ahmadınejad sondaı-aq, Irannyń Qurama Shtattar tarapynyń ne shabýylynan, ne sanktsııalarynan qoryqpaıtynyn aıtty. Onyń aıtýynsha, AQSh jańa sanktsııalarmen Irannan góri, ózine úlken zardap ákeledi, jáne ol qadam problemany dıplomatııalyq jolmen sheshpek bolǵan amerıkan ókimetiniń is-áreketteriniń kúıregeni. Iranǵa basqa memlekettiń tarapynan shabýyl jasalǵan jaǵdaıda, Islam Respýblıkasy da «qarap qalmaıdy», dep málim etti ol.
AQSh pen Batystyń birqatar elderi Iranǵa ıadrolyq qarý jasap otyr degen kúdik keltirýde jáne Islam Respýblıkasyna qarsy jańa sanktsııalar engizýge shaqyrýda. Al Tegran ıadrolyq baǵdarlamasynyń beıbit maqsatta ekenin aıtýdan tanbaýda.
