M.Ahmadınejad: Iran ýrandy syrtta baıytýǵa ázir
ASTANA. Aqpannyń 3-i. QazAqparat - Iran Birikken Ulttar uıymy talap etip otyrǵandaı, ýrandy syrtta baıytýǵa ázir. Iran Prezıdenti Mahmud Ahmadınejad osyndaı málimdeme jasady,
dep habarlaıdy Associated Press agenttigi.
«20 paıyzǵa deıin jete baıytý úshin ýrandy shetelge jóneltýge baılanysty bizde eshqandaı problema joq», dep málim etti Iran Prezıdenti memlekettik telearnaǵa bergen suhbatynda.
Iran basshylyǵy ýrandy jete baıytý úshin shetelge jóneltý týraly BUU janyndaǵy MAGATE uıymynyń josparyn teriske shyǵarǵan bolatyn. Tegran ózine qajetti ıadrolyq otyndy ózi óndiretinin málim etken edi.
AQSh, Izraıl jáne taǵy birqatar memleketter Iran úkimetin ıadrolyq qarý jasap jatyr dep aıyptasa, Islam Respýblıkasynyń basshylary, ıadrolyq baǵdarlamanyń beıbit maqsatta ekenin aıtýdan jalyqpaýda.
