ІІM adam saýdasyna qatysy bar eki qylmystyq topty quryqtady
ASTANA. KAZINFORM — Astana qalasy jáne Soltústik Qazaqstan oblysynyń uıymdasqan qylmysqa qarsy kúres bólinisteri men prokýratýra organdarynyń birlesken jedel is-sharalarynyń nátıjesinde el aýmaǵynda adam saýdasyna baılanysty qylmystarǵa qatysy bar eki qylmystyq toptyń áreketi toqtatyldy. Bul týraly Polisia.kz jazdy.
— Qylmyskerler ınternet-resýrstardy júıeli túrde paıdalana otyryp, jynystyq qanaýǵa qatysty zańsyz qyzmet túrlerin jarnamalap, júrgizip otyrǵan. Olardyń áreketi uıymdasqan sıpatqa ıe bolyp, mıllıardtaǵan paıda tabýǵa ákelgen, — delingen habarlamada.
Aldyn ala derekter boıynsha qylmystyq toptyń kúndelikti tabysy 1,5 mln teńgege deıin jetken, al 2024 jyldyń basynan beri qarjy aınalymy 1,7 mlrd teńgeden asady. Bul — qylmystyq jeliniń aýqymyn jáne uıymdasqan deńgeıin kórsetedi.
— Júrgizilgen tintý barysynda aqsha, bank kartalary, avtokólikter, kompıýterler, uıaly telefondar jáne basqa da tsıfrlyq aqparat tasymaldaǵyshtar tárkilendi. Negizgi fıgýranttar men olardyń sybaılastaryna qatysty qamaýǵa alý túrindegi bultartpaý sharasy qoldanyldy, — delingen quzyrly organnyń habarlamasynda.
Atalǵan faktiler boıynsha Qylmystyq kodekstiń adam saýdasy men uıymdasqan qylmystyq topty qurý jáne oǵan qatysý baptary boıynsha sotqa deıingi tergeý amaldary júrgizilýde. 12 jylǵa deıin bas bostandyǵynan aıyrý jáne múlkin tárkileý túrindegi jaza qarastyrylǵan.
Іshki ister mınıstrligi basqa da múddeli memlekettik organdarmen birlese otyryp, zańsyz qyzmetti júzege asyrý úshin paıdalanylatyn ınternet-resýrstardy anyqtaý jáne buǵattaý jumystaryn belsendi túrde jalǵastyrýda.
Aıta keteıik, ınterpol adam saýdasyna qarsy operatsııa barysynda 160-qa jýyq kúdiktiniń ustalǵanyn habarlaǵan edi.