ІІM: 9 aıda 6 myńnan astam esirtkige qatysty qylmystyq quqyqbuzýshylyq anyqtaldy

ASTANA. KAZINFORM — Іshki ister mınıstrligi «Zań men Tártip» qaǵıdasyn iske asyrýdy jalǵastyryp jatyr. Qazaqstan boıynsha bıyl 9 aıda 6 myńnan astam esirtkige qatysty qylmystyq quqyqbuzýshylyq anyqtalǵan, dep habarlaıdy Polisia.kz.

— Zańsyz aınalymǵa 26 tonnadan astam túrli esirtki túrleri, sonyń ishinde 1 tonnadan astam sıntetıkalyq zattardyń túsýine jol berilmedi. Bul — 11 mıllıonnan astam bir rettik dozaǵa teń. Osylaısha mıllıondaǵan azamattardyń densaýlyǵy men myńdaǵan otbasylardyń taǵdyry qorǵaldy, - deıdi ІІM esirtki qylmysyna qarsy is-qımyl komıtetiniń tóraǵasy Danııar Meıirhan. 

Ol sondaı-aq maqsatty jedel-izdestirý is-sharalarynyń nátıjesinde 16 uıymdasqan qylmystyq toptyń joıylǵanyn, onyń 5-eýi transulttyq sıpattaǵy topqa jatatynyn aıtty. 

— Osy toptardyń basshylary men belsendi qatysýshylary ustalyp, 950 keliden astam esirtki tárkilendi. 12 sıntetıkalyq esirtki óndiretin zerthananyń jáne 93 kannabıs ósiriletin fıtozerthananyń qyzmeti toqtatyldy. Esirtki óndirýge paıdalanylǵan 23 tonnadan astam hımııalyq zattar men 17 tonna prekýrsor tárkilendi. 

Budan bólek, esirtki jarnamasyna qatysty 170 qylmystyq is qozǵalyp, kúmándi operatsııalarǵa qatysy bar 45 myńnan astam bank shoty buǵattaldy. Tutastaı alǵanda, bul shamamen 2,5 mıllıard teńgeni quraıdy. Esirtki jolyna túsken árbir adam bir nárseni anyq túsinýi tıis: esh ýaqytta jazadan qutylý múmkin emes. Bul baǵyttaǵy jumys júıeli túrde jalǵasýda, - dedi Danııar Meıirhan. 

Eske sala keteıik, buǵan deıin SQO-da bıyl 10 fıtoesirtki zerthanasy joıylǵanyn jazǵan edik.