ІІM: 6 myń esirtki saıty men 9 myń bank kartasy buǵattaldy
ASTANA. KAZINFORM – ІІM birinshi jartyjyldyqtaǵy esirtki qylmysyna qarsy jumysty qorytyndylady.
2024 jyly Іshki ister mınıstriniń bastamasymen Esirtki qylmysyna qarsy is-qımyl komıteti quryldy. Bul usynysty Memleket basshysy qoldady. Respýblıkalyq nashaqorlyqqa qarsy shtabtyń mártebesi premer-mınıstr deńgeıine deıin kóterildi.
— Qabyldanǵan sharalardyń arqasynda biz mańyzdy nátıjelerge qol jetkizdik. Búginde esirtki qylmysyna qarsy kúres memlekettik deńgeıde 2026-2028 jyldarǵa arnalǵan úsh jyldyq keshendi jospar aıasynda júrgizilýde. Alǵash ret Esirtki quqyq buzýshylyqtarynyń aldyn alý jónindegi keńes quryldy. Onyń quramyna medıa salasynyń tanymal ókilderi, ataqty sportshylar, din jáne mádenıet, qoǵam qaıratkerleri engizildi. Osyndaı keńester elimizdiń barlyq óńirinde jumys isteıdi. Komıtet zańnamany jetildirýden bastap tsıfrlyq tehnologııalardy damytýǵa deıin barlyq baǵytta júıeli jumys istep jatyr. Mamyr aıynda sheteldik áriptestermen birlesip, Ýkraına aýmaǵynda iri esirtki call-ortalyǵynyń qyzmeti joıylyp, 11 kúdikti ustaldy. Olar Qazaqstan azamattaryn esirtki shemalaryna tartýmen jáne olardy zańsyz qyzmetke jumyldyrýmen aınalysqan, — dedi ІІM esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Bıylǵy jyldyń birinshi jartyjyldyǵynda 7 tonnadan astam esirtki, onyń ishinde jarty myń kılogramnan astam sıntetıkalyq esirtki tárkilendi.
— 15 esirtki zerthanasynyń qyzmeti joıylyp, alty uıymdasqan qylmystyq toptyń áreketine tosqaýyl qoıyldy. Onyń ishinde bireýi transulttyq sıpatta. Esirtki qylmysynyń kıberkeńistik pen krıptovalıýta salasyna aýysqanyn eskere otyryp, ınternet jelisinde júıeli jumys uıymdastyryldy: «Kıbernadzor» júıesi arqyly zańsyz kontenti bar 6 myń saıt buǵattaldy; «Antıfrod-ortalyq» arqyly qarjylandyrý júrgizilgen 9 myń bank kartasy buǵattalyp, jalpy somasy 135 mıllıon teńge kólemindegi qarajatqa shekteý qoıyldy. «Targetıng-ortalyǵy» quryldy, — dedi ol.
Esirtki quraldary men psıhotroptyq zattardyń zańdy aınalymy salasynda júıeli jumys júrgizilýde.
— Prekýrsorlar men kúshti áser etetin zattardyń, sondaı-aq «dropperlik» qyzmettiń zańsyz aınalymy úshin qatań jaýapkershilik engizildi. Kórshiles memleketterdegi áriptestermen, sondaı-aq halyqaralyq uıymdarmen yntymaqtastyqty keńeıtip kelemiz. Ortalyq Azııa óńirlik aqparattyq-úılestirý ortalyǵynyń áleýetin tıimdi paıdalanyp jatyrmyz. Jyl basynan beri sheteldik seriktestermen 20-dan astam kezdesý ótkizildi. Tıisti ózara is-qımyldy júzege asyrý úshin barlyq qajetti quqyqtyq baza qalyptastyrylǵan. Qazaqstan esirtki qylmysyna qarsy is-qımyl salasyndaǵy jahandyq úılestirýdiń mańyzdy alańyna aınalyp otyr. Aqpan aıynda 15 memlekettiń ókilderiniń qatysýymen prekýrsorlar máseleleri jónindegi óńirlik jumys tobynyń otyrysy ótkizildi, — dedi ІІM esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Aıta ketelik elordada polıtsııa sıntetıkalyq esirtki jetkizý arnasynyń jolyn kesken edi.
