«M-1 Challenge 64» týrnırinde aqtóbelik S.Morozov reseılikke qarsy shyǵady
ASTANA. QazAqparat - Búgin Máskeýdegi «Olımpııskıı» sport kesheninde «M-1 Challenge 64» týrnıri ótpek. Oǵan 2014-2015 jyldary aralyǵynda áýesqoılar arasyndaǵy álem chempıonatynyń kúmis jáne qola júldegeri, MMA jekpe-jeginen qazaqstandyq myqty sportshylardyń biri sanalatyn Sergeı Morozov qatyspaq, dep habarlady Qazaqstan MMA federatsııasynan.
M-1 Global álemdik promoýshenimen kelisimshartqa qol qoıǵan aqtóbelik S.Morozov kásibı jekpe-jegin reseılik tájirıbeli sportshy Pavl Vıtrýkpen ótkizedi. Aıta keterligi, bul jekpe-jekte bizdiń sportshy jeńiske jetetin bolsa, onda ol kelesi kezdesýin M-1 Challenge chempıony ataǵyn úshin ótkizýge múmkindik alady.
Aıta keterligi, S.Morozov buǵan deıin 6 márte jekpe-jek ótkizip, olardyń barlyǵynda da merziminen buryn tehnıkalyq nokaýtpen jeńiske jetken edi.
Týrnırdi «Match» telearnasynan 00:30-da tamashalaýǵa bolady.
