Lıýksembýrgtiń Uly gertsogy Anrı bılikti úlken ulyna tapsyrdy

ASTANA. KAZINFORM — 3 qazan, juma kúni Lıýksembýrg resmı túrde 25 jyldyq Anrı dáýirimen qoshtasyp, jańa monarhty qarsy aldy, dep habarlaıdy Kazinform agenttigi. 

70 jastaǵy Uly gertsog Anrı taqtan bas tartty. Rásimge Nıderland pen Belgııadan kelgen qonaqtar qatysty. Odan keıin onyń úlken uly 43 jastaǵy murager hanzada Gııom parlamentte ant berip, 1890 jyldan beri eldi basqaryp kele jatqan Nassaý-Veılbýrg áýletiniń jetinshi monarhy atandy.

Gııom V Konstıtýtsııany saqtaýǵa jáne halyq múddesin qorǵaýǵa ant berdi. Taqqa otyrý rásimindegi sózinde jańa monarh ata-anasyna olardyń qyzmet úlgisi úshin alǵys aıtyp, eldi «progress pen eýropalyq seriktestik jolymen» basqarýǵa nıetti ekenin málimdedi.

Gııom — Ulybrıtanııadaǵy Sandherst koroldik áskerı akademııasynyń túlegi, sondaı-aq Anje ýnıversıtetinde saıasattaný jáne óner mamandyqtary boıynsha qos dıplom ıegeri. Ol óz róline uzaq jyl boıy daıyndalǵan. Ákesinen aıyrmashylyǵy, Gııom Lıýksembýrgtiń qarapaıym mektepterinde oqyǵan, bul ony qoǵamǵa jaqyndata túsedi dep atap ótti premer-mınıstr Lıýk Frıden.

Gııomnyń otbasylyq ómiri de áýlettik sabaqtastyq pen jańǵyrýdy kórsetedi. 2012 jyly onyń Stefanııa hanshaıymǵa úılenýi ulttyq deńgeıdegi mańyzdy oqıǵaǵa aınaldy. Búginde olardyń eki balasy bar — bes jastaǵy Sharl jáne úsh jastaǵy Fransýa. Endi bes jastaǵy Sharl álemdegi eń jas taq murageri atandy.

Sarapshylar monarhtyń rólinde túbegeıli ózgeris bolmaıdy dep sanaıdy: Uly gertsog áli de negizinen ókildik mindetter atqaryp, zańdardy bekitýmen shekteledi. Alaıda belgııalyq tarıhshy Patrık Veberdiń pikirinshe, Gııomnyń minezinde anasy Marııa-Terezanyń kýbalyq túp-tamyryna baılanysty «latyndyq stıl» baıqalýy múmkin.

Anrı óz sheshimin «baıaý ómir súrip, erkindikti qaıta sezingisi» keletinin aıtty. Onyń taqtan ketýi Lıýksembýrgtegi shırek ǵasyrlyq turaqtylyq kezeńiniń aıaqtalýyn bildirse, Gııomnyń taqqa kelýi — 680 myń halqy bar, biraq Eýropada eleýli ról atqaratyn eldiń monarhııasynyń jańarý sımvolyna aınaldy.

Bıliktiń aýysý rásimi saltanatty jaǵdaıda ótti. Sheteldik qonaqtar arasynda Belgııa men Nıderland koroldik otbasylarynyń músheleri, Eýroparlament tóraıymy Roberta Metsola jáne Eýropalyq keńes tóraǵasy Antonıý Koshta boldy. Premer-mınıstr Lıýk Frıden Uly gertsog Anrıdiń bıligin «birlik pen Lıýksembýrgtiń halyqaralyq bedelin nyǵaıtqan kezeń» dep baǵalady.

Merekelik is-sharalar jeksenbige deıin jalǵasady. Osy kúnderi Lıýksembýrg dástúr, áýlettik sabaqtastyq pen zamanaýı qoǵam úmitteri toǵysqan sahnaǵa aınalmaq.

Buǵan deıin Lıýksembýrg Palestınany resmı túrde moıyndaǵany habarlanǵan edi.