Lıýksembýrgte qoǵamdyq kólikterdiń tegin qatynaǵanyna 3 jyl boldy
LıÝKSEMBÝRG. QazAqparat – Lıýksembýrgtiń qoǵamdyq kólikter tegin qatynaıtyn álemdegi birinshi el bolǵanyna – úsh jyl, dep habarlaıdy QazAqparat euronews-ke silteme jasap.
El bıligi bul bastamany salyqtardyń esebinen qarjylandyryp otyr.
«Bul qomaqty shyǵyndy talap etedi. Sonymen birge sizder onyń is júzinde salyqtardyń esebinen jabylatynyn bilýińiz qajet. Ol barlyq salyq tóleýshiler esebinen tólenedi. Munyń úlken ádildigi bar. Óıtkeni, kim az salyq tólese, bul júıege az tólem jasasa nemese eshteńe tólemese de tegin bolady. Al mol salyq tóleıtinder júıege kóbirek tólem jasaıtyndyǵy anyq», - dedi Lıýksembýrgdiń utqyrlyq mınıstri Fransýa Baýsh.
Degenmen, elde jeke kólikpen júretinderdiń sany áli de basym. Al tegin kólik júıesin qoldanýshylar ony «fýndamentaldy quqyq» dep ataıdy.
«Bul shekaralas barlyq turǵyndardyń, ásirese Belgııa, Germanııa jáne Frantsııa azamattarynyń emin-erkin saıahattaýyna múmkindik beredi. Munan bólek, bul erkindiktiń jaqsy túri. Tekserýshiler de az, mashaqat ta az. Jol júrý tegin bolǵandyqtan qoǵamdyq kólik pen jeke avtomobıl arasynda tańdaý jasaý, sheshim qabyldaý da jyldam. Sonymen qatar bul qorshaǵan ortaǵa da oń áserin tıgizedi ári únemdi», - dep atap ótedi jolaýshylar.
