Lıýksembýrgte qoǵamdyq kóliktegi jol aqysy tegin bolady
ASTANA. QazAqparat - 2020 jyldyń naýryz aıynan bastap Eýropada ornalasqan Lıýksembýrg memleketindegi qoǵamdyq kóliktegi jol júrý aqysy tegin bolady. BBC basylymynyń jazýynsha, Lıýksembýrgte jol keptelisi úlken problemaǵa aınalǵan.
«Byltyrǵy jyldyń sońynda Lıýksembýrg bıligi aldaǵy ýaqytta qoǵamdyq kólik aqysy tegin bolatynyn habarlaǵan. Osyǵan baılanysty 2020 jyldyń 1 naýryzynan bastap memlekettegi tramvaı, metro, avtobýsta jol júrý tegin bolady», - dep jazady basylym.
Avtordyń aıtýynsha, bul ereje osy memleket arqyly ótetin 175 myń qyzmetkerge de qatysty, ıaǵnı, Germanııa, Belgııaǵa saǵattap jol júrip jumysqa baratyn qyzmetkerler de memlekette Lıýksembýrgtiń 602 myń turǵyny sekildi qoǵamdyq kólikti tegin qoldanatyn bolady.
«Sońǵy qyryq jylda Lıýksembýrgtegi halyq sany 240 myń adamǵa kóbeıgen. Búgingi tańda memleket Eýroodaq boıynsha bir adamǵa shaqqandaǵy kólik sany boıynsha kósh bastap tur. Memlekette jumys isteıtin azamattardyń 60% óz kóligimen qatynaıdy, al qoǵamdyq kólikpen halyqtyń 19% ǵana júredi», - dep jazady avtor.
Onyń aıtýynsha, tegin jol aqysyn engizýge tek avtokólikterdiń qorshaǵan ortaǵa zııany men halyqty qoǵamdyq kólikke yntalandyrýdan basqa da sebepter áser etken.
«Eń aldymen bul - áleýmettik shara. Onyń maqsaty - kedeıler men baılar arasyndaǵy aıyrmashylyqty azaıtý. Jalaqysy az azamattar úshin jol aqysy da aqsha, sol sebepti ony múldem tegin etkendi jón kórdik», - depti bılik ókilderi.
Degenmen, avtordyń aıtýynsha, Lıýksembýrg tegin qoǵamdyq kólikke kóshetin alǵashqy memleket emes eken.
«2013 jyly Estonııa astanasy Tallın qalasynda tegin qoǵamdyq kólik júıesi engizilgen bolatyn. Sonymen qatar, Frantsııanyń Dıýnkerk qalasy da 2018 jyldyń qyrkúıeginen bastap jol aqysyn tegin qylǵan edi», - dep jazady avtor.
