Lıýksembýrgte Qazaqstan táýelsizdiginiń 35 jyldyǵyna oraı Shanyraq Fest ótti
ASTANA. KAZINFORM — Lıýksembýrgte Qazaqstan táýelsizdiginiń aldaǵy 35 jyldyǵyna arnalǵan Shanyraq Fest Luxembourg saltanatty kontserti ótti, dep habarlaıdy Kazinform agenttiginiń EO-daǵy menshikti tilshisi.
Kontsertti Shymkent qalasy ákimdiginiń jáne ERG men Cargolux kompanııalarynyń qoldaýymen Qazaqstan Respýblıkasynyń Lıýksembýrgtegi elshiligi uıymdastyrdy. Іs-sharaǵa Lıýksembýrg memlekettik organdarynyń, dıplomatııalyq korpýstyń, iskerlik jáne akademııalyq toptardyń, mádenı uıymdardyń jáne qazaq dıasporasynyń ókilderi qatysty.
Qazaqstannyń Lıýksembýrgtegi Elshisi Roman Vasılenko qonaqtarǵa quttyqtaý sózin arnady.
— Biz Qazaqstan men Lıýksembýrg arasyndaǵy qarym-qatynastardyń negizi bolǵan senimdi baǵalaımyz jáne tyǵyz yntymaqtastyq múmkindikterin kórip otyrmyz, — dep atap ótti elshi.
Ekijaqty yntymaqtastyqtyń nátıjeleriniń qatarynda Roman Vasılenko maýsym aıynda Astana arqyly Cargolux áýe júk tasymalynyń qaıta bastalǵanyn, qazan aıynda Lıýksembýrg kompanııalary delegatsııasynyń Qazaqstanǵa saparyn jáne Lıýksembýrgtiń SES kompanııasynyń tehnologııasyn paıdalana otyryp, Air Astana ushaqtaryna spýtnıktik ınternet engizilgenin atap ótti.
— Lıýksembýrg pen Qazaqstannyń ortaq tustary kóp jáne men elderimiz arasyndaǵy yntymaqtastyqtyń jańa qarqynmen damyp kele jatqanyna qýanyshtymyn, — dep atap ótti
Lıýksembýrg úkimeti atynan qabyldaýda sóz sóılegen Lıýksembýrg Syrtqy jáne eýropalyq ister, qorǵanys, damý yntymaqtastyǵy jáne syrtqy saýda mınıstrliginiń Syrtqy saýda jáne ınvestıtsııalardy ilgeriletý departamentiniń dırektory Per Ferıng.
«Shymkent kontsert» uıymynyń ártisteri dástúrli qazaq jáne qazirgi zamanǵy shyǵarmalardan turatyn kórkem baǵdarlama usyndy. Sahnada «Qaǵan» etnofolklorlyq ansambli, «ıAssy» bı ansambli, dástúrli mýzyka oryndaýshylary jáne uıymnyń jeke oryndaýshylary da ónerimen kórermendi tánti etti.
Kontsertten keıin resmı qabyldaý ótip, onda qonaqtar mádenı, ekonomıkalyq jáne gýmanıtarlyq yntymaqtastyqtyń perspektıvalaryn talqylady.
Shanyraq Fest Luxembourg Elshiliktiń Qazaqstan ónerin eýropalyq kórermenderge tanystyrýǵa baǵyttalǵan mádenı is-sharalar serııasynyń jalǵasy boldy.
Biz buǵan deıin qazaq mýzykasynyń Lıýksembýrg kórermenin baýrap alǵany týraly jazǵan edik.