Lıýksembýrgte Abaıdyń 175 jyldyǵyna arnalǵan kontsert ótti

LıÝKSEMBÝRG. QazAqparat – Seısenbi kúni keshke Lıýksembýrg fılarmonııasynyń kameralyq mýzyka zalynda «Qazaq dalasy» atty mýzykalyq kontserti ótti, dep habarlaıdy QazAqparat tilshisi.

Kontsert qazaqtyń uly aqyny, kompozıtor jáne fılosof Abaıdyń 175 jyldyǵyna arnaldy. Merekelik keshti Belgııa Koroldigindegi QR Elshiligi men Lıýksembýrg Uly Gertsogtigindegi Qazaqstannyń qurmetti konsýldyǵy uıymdastyrdy.

Kontsertte Abaı ánderin, sondaı-aq Eýropalyq mýzykanyń keıbir týyndylaryn qazaqstandyq ártister pıanıst Áıgerim Mataeva men opera ánshisi Qudaıbergen Ábildın oryndady.

Kontsert bastalar aldynda QR-nyń Belgııadaǵy Elshisi Aıgúl Quspan eýropalyq aýdıtorııaǵa qazaqtyń uly aqyny jáne aǵartýshysy týraly aıtyp berdi. Ol óz sózinde Abaıdyń otandyq mádenıet pen ulttyq qundylyqty damytýǵa qosqan eleýli úlesi men shyǵarmashylyq murasyn atap ótti. Sonymen qatar, A.Quspan uly aqynnyń qara sózderiniń birin frantsýz tilinde oqydy.

Sondaı-aq, Lıýksembýrg fılarmonııasynyń zalynda Qazaqstanǵa arnalǵan fotokórme uıymdastyryldy.