Lıýksembýrg - Qazaqstan fýtbol quramasynyń Eýropadaǵy 43-qarsylasy

ASTANA. KAZINFORM - Lıýksembýrg Qazaqstan quramasynyń Eýropa qurlyǵyndaǵy 43-shi qarsylasy bolady. Eki qurama 26 naýryzda joldastyq kezdesý ótkizedi.

Lıýksembýrg - Qazaqstan quramasynyń Eýropa qurlyǵyndaǵy 43-qarsylasy bolmaq. Qazaqstan buǵan deıin Eýropadaǵy 42 quramamen oınaǵan.

Ázirge qazaqstandyq fýtbolshylar eresekter arasynda Bolgarııa, Gıbraltar, Izraıl, Ispanııa, Italııa, Kosovo, Lıhtenshteın, Norvegııa, Soltústik Makedonııa, Ýels jáne Shveıtsarııa quramalarymen oınaǵan joq.

Eki qurama budan buryn Ulttar lıgasy S joly boıynsha pleı-off satysy jartylaı fınalynda qarsylastaryna ese jiberdi.

Aldymen Lıýksembýrg Grýzııaǵa 0:2 esebimen jeńilse, odan keıin Qazaqstan Grekııaǵa 0:5 esebimen jol berdi.

Saldarynan eki qurama Eýropa chempıonaty fınaldyq satysynda beriletin joldama úshin jarysty jalǵastyrýdan shet qaldy.

Eýropada Lıýksembýrg burynǵy jyldarda aýtsaıder qurama retinde sanalatyn. Keıingi jyldarda jaqsy nátıjege qol jetkizip, Álem jáne Eýropa chempıonaty irikteý satysynda joǵary deńgeıde oıyn kórsetip keledi.