Lıýksembýrg asteroıdtan ken óndirýdi josparlap otyr
ASTANA. QazAqparat - Lıýksembýrg asteroıdtarda ken óndirýdi damytý isin qolǵa almaq, dep habarlaıdy Financial Times gazeti.
Ǵarysh salasyn zertteý Lıýksembýrgte jaqsy damyǵan, ol spýtnıkter jáne olarmen baılanystyratyn tehnologııalardy damytý salasynda mańyzdy ról atqarady. Bul elde iri spýtnıkter operatory - SES kompanııasy tirkelgen.
Qazirgi kezde Lıýksembýrg AQSh jáne eýropalyq seriktestermen birigip, asteroıdtardan baǵaly metaldar jáne Jerde jetispeıtin ózge shıkizatty óndirýge múmkindik beretin tehnologııalardy ıgerýdi kózdep otyr. Bul Aıdan ary qaraı, biraq Marstan jaqyn, ǵarysh kemeleri jete alatyndaı qashyqtyqta ornalasqan Jer tóńiregindegi aspan denelerine qatysty. Qazir Jer men Mars orbıtalarynyń arasynda 12 myńnan astam asteroıd tabylǵan.
Olardan tabylǵan qymbat metaldar, mysaly, platına tobyndaǵylardy jerge aldyn ala óńdelip jetkizý josparlanyp otyr.
Eýropalyq ǵarysh agenttiginiń basshysy Jan-jak Dorden: «Biz asteroıdtarǵa jetý jolyn, onda burǵylaý jumystaryn qalaı ótkizý jáne úlgilerdi Jerge qalaı jetkizý kerektigin bilemiz», - dep málimdedi. Onyń aıtýyna qaraǵanda, ǵarysh keńistiginde baǵaly ken óndirý jumystarynyń quny 100 mlrd dollardan tómen bolsa da, «bul trıllıondaǵan kólemdegi naryqty jasaýǵa» múmkindik beretin bolyp shyqty.
