Lıýbov Nysanbaeva tarıhı nysandardy súrýge qatysty pikir bildirdi
NUR-SULTAN. QazAqparat – Ortalyq kommýnıkatsııalar qyzmetinde ótken brıfıng barysynda QR qala qurylysshylary odaǵynyń prezıdenti Lıýbov Nysanbaeva tarıhı-mádenı nysandardy súrýge qatysty pikir bildirdi, dep habarlaıdy QazAqparat tilshisi.
«Tarıhı mańyzy bar mádenı nysandardy súrý máselesi Almatyda jıi týyndaıdy. Jalpy, el boıynsha da mundaı problema az emes. Biz barynsha mura bolyp qalǵan sáýlet marjandaryn saqtap qalýymyz qajet. Ol zańda da jazylǵan. Degenmen, jergilikti jerdegiler qandaı da bir qurylysty josparlaý aldynda qalanyń bas josparyna qaramaıdy. Onda tarıhı nysandar kórsetilgen. Tipti, atalǵan salanyń keıbir basshylary óńirlerinde keremet kóne ǵımarattar baryn bilmeıdi. Biz jańadan salatyn nysandarǵa qaraǵanda, qolda bar eski sáýlet týyndylaryn saqtap qalýdy oılaýymyz kerek», - dep atap ótti Lıýbov Nysanbaeva.
Buǵan deıin brıfıng aıasynda QR qurmetti sáýletshisi Arqynjan Mámetov sáýlet salasyn oǵan múlde qatysy joq azamattar basqaryp otyrǵanyn málimdegen edi.
Al, sáýletshi Alekseı Abılov qalanyń bas josparyna baǵynbaǵan qurylys kompanııalaryn jazalaýdy usyndy.
