Lıanıýngandaǵy Qazaqstan-Qytaı logıstıkalyq bazasynyń júk aınalymy 14 paıyzǵa artty
ASTANA. KAZINFORM - 2025 jyly Qytaı men Qazaqstan arasyndaǵy kólik-logıstıka salasyndaǵy negizgi yntymaqtastyq jobalary qarqyndy iske asyrylyp, mýltımodaldy tasymaldarǵa arnalǵan jańa Eýrazııalyq qurlyq-teńiz dálizin qalyptastyrýǵa tyń serpin berdi. Bul týraly Kazinform agenttigi Sınhýa aqparat kózine silteme jasap habarlaıdy.
Ótken jyldyń qorytyndysy boıynsha Qytaıdyń shyǵysynda, Tszıansý provıntsııasyndaǵy Lıanıýngan qalasynda ornalasqan qytaı-qazaqstandyq logıstıkalyq baza arqyly ótken jalpy júk aınalymy 5,1597 mln tonnany qurap, 13,74 paıyzǵa ósken.
Eki el shekarasyndaǵy «Qorǵas – Shyǵys qaqpasy» qurǵaq portynda barlyǵy 340 myń standartty konteıner óńdeldi. Bul 2024 jylmen salystyrǵanda 4,78 paıyzǵa artyq. Sonymen qatar Qazaqstandaǵy Aqtaý portyndaǵy konteınerlik hab jobasynyń birinshi kezeńin iske asyrý jumystary aıaqtalyp, ony paıdalanýǵa berý daıyndyǵy qarqyndy júrip jatyr. Bul týraly Sınhýa agenttigine «Lıanıýngan porty» tobyna qarasty korporatsııa habarlaǵan.
Sınhýa málimetinshe, 2014 jyly resmı túrde paıdalanýǵa berilgen Lıanıýngandaǵy qytaı-qazaqstan logıstıkalyq bazacy «Bir beldeý, bir jol» bastamasy aıasyndaǵy alǵashqy naqty joba sanalady. Qazirgi tańda ol Ortalyq Azııa elderi úshin mańyzdy teńizge shyǵatyn qaqpaǵa aınalǵan.
— 2025 jyldyń jeltoqsan aıynyń sońyna qaraı bazanyń jıyntyq júk aınalymy 43,02 mln tonnaǵa jetti. Qazirgi ýaqytta ol arqyly Azııa men Eýropadaǵy 104 stantsııany qamtıtyn halyqaralyq temirjol júk tasymalynyń alty baǵyty ótedi. Bul nysan Ortalyq Azııanyń bes eli úshin tranzıttik tasymal, qoımalaý, logıstıka jáne saýda salalaryndaǵy mańyzdy platformaǵa aınaldy. Munda bıdaı, turmystyq tehnıka, fotoelektrlik modýlder sekildi 400-den astam taýar túri jınaqtalyp, taratylady, — delingen habarlamada.
Lıanıýngannan jóneltilgen júk Qytaı–Eýropa jáne Qytaı–Ortalyq Azııa baǵytyndaǵy halyqaralyq júk poıyzdary arqyly Almatyǵa alty kúnde, al Ózbekstan astanasy Tashkentke shamamen on kúnde jetkiziledi. Budan bólek, Lıanıýngan portynan teńiz arqyly álemniń 150-den astam elindegi myńǵa jýyq portqa júk tasymaldaýǵa múmkindik bar.
Lıanıýngan qalasyndaǵy Qytaı–Qazaqstan halyqaralyq logıstıkalyq kompanııasy bas dırektorynyń orynbasary Ázilhan Bedelovtyń aıtýynsha, baza arqyly Ortalyq Azııadan Ońtústik-Shyǵys Azııaǵa bıdaı men mıneraldyq ónimder tıimdi ári qaýipsiz jetkiziledi. Al keri baǵytta Qytaıdan, Koreıa Respýblıkasynan, Japonııadan jáne ózge elderden avtokólikter, fotoelektr ónimderi men túrli taýarlar tasymaldanady.
«Qorǵas – Shyǵys qaqpasy» qurǵaq porty — Lıanıýngandaǵy logıstıkalyq bazadan keıingi Qytaı men Qazaqstannyń logıstıka salasyndaǵy ekinshi birlesken jobasy. Joba aıasynda qytaı-qazaqstan temirjol aýystyryp tıeý stantsııasy, bıdaı tıeý termınaly jáne konteıner alańy salynǵan.
«KTZE-Khorgos Gateway» JShS bas dırektorynyń orynbasary Chen ıÝnnyń aıtýynsha, 2025 jyly qurǵaq portta keń tabandy 10 jańa temirjol jelisi salyndy. Sonymen qatar konteınerlerdi jedel óńdeý úshin ınfraqurylymdy zııatkerlik jańǵyrtý jumystary júrgizildi. Nátıjesinde konteınerlerdi aýystyryp tıeý ýaqyty bes saǵattan bir saǵatqa jetpeıtin merzimge qysqarǵan.
Osylaısha port Qytaı–Eýropa jáne Qytaı–Ortalyq Azııa baǵyttaryndaǵy transshekaralyq júk tasymaldarynyń mańyzdy torabyna aınaldy.
Qurǵaq porttyń logıstıkalyq hab retindegi artyqshylyqtarynyń arqasynda Qazaqstandaǵy «Qorǵas – Shyǵys qaqpasy» arnaıy ekonomıkalyq aımaǵynda túrli saladaǵy kásiporyndar qyzmet ete bastady. Bul óńdeý ónerkásibiniń, aqparattyq tehnologııalardyń, logıstıka men ózge de salalardyń damýyna yqpal etip otyr.
«Lıanıýngan porty» tobynyń deregine sáıkes, Qazaqstandaǵy Aqtaý portyndaǵy konteınerlik hab jobasynyń birinshi kezeńin 2026 jyldyń maýsym aıynda paıdalanýǵa berý josparlanǵan. Aıta keteıik, 2025 jyldyń maýsymynda bul joba aıasyndaǵy alǵashqy iske qosý kesheniniń birinshi kezeńi resmı túrde paıdalanýǵa berilgen edi.
Qytaı–Eýropa baǵytyndaǵy poıyzdardyń qaýipsizdigi men tıimdiligin arttyrý maqsatynda 2023 jyly «Lıanıýngan porty» toby men «Qazaqstan temir joly» ulttyq kompanııasy Aqtaý portyndaǵy konteınerlik hab jobasyn júzege asyrý jóninde strategııalyq yntymaqtastyq týraly kelisimge qol qoıǵan. Bul — Kaspıı teńizi jaǵalaýyndaǵy qytaı ınvestıtsııasy qatysqan alǵashqy iri logıstıkalyq joba.
Jobanyń jalpy aýmaǵy shamamen 19 gektardy quraıdy, al jobalyq ótkizý qabileti jylyna 240 myń TEU-ǵa teń. Joba eki kezeńmen júzege asyrylady. Birinshi kezeń 9,1 gektar aýmaqty qamtıdy. Munda úsh temirjol júk tıeý-túsirý jelisi men shamamen 690 konteıner ornalastyrýǵa múmkindik beretin alań salynǵan. Ol konteınerlerdi aýystyryp tıeý, kedendik tekserý jáne qaýipti júkterdi óńdeý sekildi operatsııalardyń tolyq tsıklin júzege asyrýǵa jol ashady.
«Aqtaý halyqaralyq konteınerlik haby» JShS bas dırektorynyń orynbasary Darhan Esmaǵambetovtyń aıtýynsha, joba ótkizý qabiletin arttyryp, júk óńdeý merzimin qysqartýǵa, Aqtaý portynyń Transkaspıı halyqaralyq kólik baǵyty /TMTM/ aıasyndaǵy negizgi torap retindegi rólin kúsheıtýge jáne jańa jumys oryndaryn ashýǵa múmkindik beredi.
Sonymen qatar arnaıy aqparattyq platforma arqyly Lıanıýngannan shyqqan Qytaı–Eýropa baǵytyndaǵy poıyzdardyń qozǵalysyn búkil marshrýt boıy naqty ýaqyt rejımde baqylaýǵa bolady. Aldaǵy ýaqytta jańa Eýrazııalyq qurlyq-teńiz kólik dálizi aıasynda mýltımodaldy tasymaldarǵa arnalǵan derekter arnasyn birlesip salý jáne paıdalaný arqyly atalǵan úsh toraptyń aqparattyq ózara baılanysyn qamtamasyz etý josparlanyp otyr.
Osyǵan deıin Qazaqstan men Qytaı sý salasynyń mamandaryn daıarlaıtyn kolledj quratyny týraly jazdyq.
